იუსტიციის უმაღლესი საბჭოს მდივანი ლევან მურუსიძე პრეზიდენტის მრჩეველებს ეხმაურება და აცხადებს, რომ მოსამართლეთა დანიშვნის შეჩერება მიუღებელია. მისი თქმით, თუ მოსამართლეები არ დაინიშნებიან, დაკითხვის ახალი წესის ამოქმედებას მოუმზადებლები შევხვდებოდით.
"ყველას აქვს თავისი აზრი. ჩვენ რომ კონკურსი არ ჩაგვეტარებინა და მოსამართლეები არ დაგვენიშნა, მოწმეთა დაკითხვის ახალ წესს მოუმზადებლები შევხვდებოდით. ვფიქრობ, საბჭომ მიიღო სწორი გადაწყვეტილება და მოახდინა მყისიერი რეაგირება ახალმიღებულ კანონზე", - განაცხადა მურუსიძემ.
პრეზიდენტის მრჩეველმა ადამიანის უფლებათა საკითხებში კახა კოჟორიძემ გუშინ,არასამთავრობო ორგანიზაციებთან შეხვედრის შემდეგ განაცხადა, რომ მოსამართლეთა შერჩევა-დანიშვნის ხარვეზებიანი პროცესი უნდა შეჩერდეს. როგორც კოჟორიძემ აღნიშნა, პარლამენტმა დაუყოვნებლივ უნდა დაიწყოს სისტემური რეფორმების გატარება.