ე.წ. კაბელების საქმის პროკურორი ნინო აღლემაშვილი აცხადებს, რომ ალექსი ბატიაშვილი არ არის მნიშვნელოვანი მოწმე, რადგან გამოძიების პროცესში ვერაფერი გაიხსენა. ამის შესახებ პროკურორმა ბატიაშვილის განცხადების შეფასებისას აღნიშნა, რომლის თანახმადაც ,,სილქნეტთან“ გაფორმებული ხელშეკრულება საქართველოს უსაფრთხოებისთვის ძალიან მნიშვნელოვანი იყო.
"ვერ გეტყვით რამდენად გაიუმჯობესა მეხსიერება ალექსი ბატიაშვილმა. ამ ეტაპზე გამოძიებისთვის იგი არ არის მნიშვნელოვანი მოწმე, რადგან გამოძიების ეტაპზე ვერაფერი გაიხსენა. ჩემთვის გაუგებარია რა შეფასებებს აკეთებს ალექსი ბატიაშვილი", - განაცხად ნინო აღლემაშვილმა.
პროკურორის თქმით, დღესვე დაიკითხება "დელტაკომის" წარმომადგენელი, რომელიც სასამართლოს მნიშვნელოვან ინფორმაციას მიაწვდის. კერძოდ, პროკურორის თქმით, "დელტაკომის" წარმომადგენელი დაადასტურებს, რომ თავდაცვის სამინისტროს იგი სთავაზობდა ოპტიკურ-ბოჭკოვან მომსახურებას უფასოდ, რაც მისი თქმით დადასტურდება დოკუმენტურად.
კაბელების საქმის ერთ-ერთმა მოწმემ ლექსო ბატიაშვილმა დღეს განაცხადა, რომ ის თავდაცვის სამინისტროში ირაკლი ალასანიას მოადგილე იყო და უშუალოდ კურირებდა კაბელების საქმესთან დაკავშირებულ პროცესს.
"არანაირი დანაშაული არ იკვეთება. ეს ხელშეკრულება არის ჩვენი ქვეყნისთვის, შეიარაღებული ძალებისთვის, თავდაცვისუნარიანობისთვის, უსაფრთხოებისთვის ძალიან მნიშვნელოვანი და ფინანსურადაც ძალიან მომგებიანი," - განაცხადა ლექსო ბატიაშვილმა.
საუბარია ,,სილქნეტთან”გაფორმებულ შეთანხმებაზე. სწორედ ამ კომპანიისთვის უპირატესობის მინიჭებასა და 4 მილიონ ლარზე მეტი საბიუჯეტო თანხის გაფლანგვას ედავება პროკურატურა თავდაცვის უწყების 5 თანამშრომელს.
