ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი აცხადებს, რომ რუსულენოვანი არხები ევროპაში რუსული პროპაგანდის წინააღმდეგ გამოიყენება და ამ თემაზე მთავრობის ფორმატში არაერთხელ იყო საუბარი.
ამერიკის დაზვერვის სამსახურის ხელმძღვანელის ანგარიშის შეფასებისას მან ასევე განაცხადა, რომ ეს იყო ერთგვარი მოწოდებაც, რომ დასავლეთის კარები საქართველოსთვის მალე გაიღოს. მინისტრის თქმით, მნიშვნელოვანია აშშ-ის მიერ აღმოსავლეთ ევროპის ქვეყნებისთვის რუსულ საფრთხეებთან გასამკლავებლად, დაფინანსების გამოყოფაზე მიღებული გადაწყვეტილება.
,,იგივე ევროპაში გაჩნდა რუსულენოვანი არხები, რადიოები, გადაცემები, რომელთა მიზანია რუსული პროპაგანდისთვის ეფექტური წინააღმდეგობის გაწევა. რუსული პროპაგანდა ზოგადად მთელ მსოფლიოში გაიზარდა და ამას სჭირდება ადეკვატური პასუხი", - განაცხადა სუბარმა და დასძინა, რომ მნიშვნელოვანია, საქართველოს მოქალაქეებს, რომლებმაც სათანადოდ არ იციან სახელმწიფო ენა, ჰქონდეთ შესაბამისი ინფორმაციის მიღების საშუალება იმ ყოველდღიურ ცვლილებებზე, რომელიც ჩვენს ქვეყანაში ხდება.