"ვიდრე საქართველო ნატო-ში გაწევრიანებას შეძლებს, საჭიროა კონსენსუსის მიღწევა MAP-თან დაკავშირებით," - ამის შესახება ნატო-ს გენერალურმა მდივანმა, იენს სტოლტენბერგმა, ბრიუსელში პრესკონფერენციაზე შესაბამისი კითხვის პასუხად განაცხადა.
"საქართველოს ყველა პრაქტიკული ინსტრუმენტი აქვს ნატო-ში გასაწევრიანებლად. თქვენ გაქვთ წლიური ეროვნული პროგრამა, თქვენ გაქვთ კომისია ნატო-საქართველო, ასევე თქვენ გაქვთ არსებითი პაკეტი. ჩვენ წინ მივდივართ და ვახორციელებთ სხვადასხვა კომპონენტს იმ პაკეტისა, რომელიც მაღალ დონეზე იყო შეთანხმებული უელსში 2014 წელს. ყველა ეს პრაქტიკული ინსტრუმენტი გამოიყენება ყოველდღიურ რეჟიმში, საქართველოს გაწევრიანებისთვის მოსამზადებლად. თქვენ ნატო-ს უახლოვდებით. MAP არის პოლიტიკური სტატუსი, რომელსაც ანიჭებენ მოკავშირეები კონსენსუსის საფუძველზე. ამიტომ, სანამ საქართველო ნატო-ში გაწევრიანებას შეძლებს, საჭიროა კონსენსუსის მიღწევა MAP-თან დაკავშირებით”, - აღნიშნა სტოლტენბერგმა.
მისივე თქმით, საქართველო ნატო-ს ერთ-ერთი ყველაზე მჭიდრო პარტნიორია.
,,რეფორმები, რომელიც შიდა პოლიტიკურ და უსაფრთხოების სფეროში ხორციელდება, საქართველოს ნატო-სთან უფრო დააახლოვებს. უელსის სამიტზე ჩვენ შევთანხმდით საქართველოსთვის არსებითი პაკეტის მინიჭებაზე და მხარდაჭერაზე ისეთ სფეროებში, როგორიცაა დაგეგმარება, ჰაერსაწინააღმდეგო თავდაცვა, საზღვაო უსაფრთხოება და კიბერთავდაცვა. ჩვენ ვიმსჯელებთ მიღწეულ პროგრესზე და როგორ შეგვიძლია, უფრო გავზარდოთ ჩვენი მხარდაჭერა საქართველოსთვის", - განაცხადა სტოლტენბერგმა.
მისი ინფორმაციით, ნატო-საქართველოს კომისიის სხდომა 11 თებერვალს გაიმართება.