პრემიერ-მინისტრი მიიჩნევს, რომ "გაზპრომის" საკითხი ამოწურულია. პლატფორმის "დაიცავი თავისუფლების" მიერ "გაზპრომთან" მიმდინარე მოლაპარაკებების საკითხზე შეხვედრის მოთხოვნის კომენტირებისას გიორგი კვირიკაშვილმა განაცხადა ასევე, რომ ,,გაზპრომთან“ არანაირ სტრატეგიულ მოლაპარაკებებზე საუბარი
არ არის.
"მე ვხვდები არასამთავრობო სექტორის ძალიან ბევრ წარმომადგენელს და მაქვს გარკვეული განრიგი. არ ვიცი, კონკრეტულად რას ეხება. "გაზპრომის" თემას თუ ეხება, მე არ მაქვს არანაირი საფუძველი იმისა, რომ ეს თემა და ამ ფორმატში განხილვა გავაგრძელო. მე მგონია, რომ ეს საკითხი ამოწურულია, იმიტომ რომ არანაირ სტრატეგიულ მოლაპარაკებებზე საუბარი არ არის. წმინდა ტექნიკური ხასიათის პრობლემების აღმოფხვრაზე იყო საუბარი და მე მგონია, რომ სრულიად უსაფუძვლოა ამასთან დაკავშირებით პოლიტიკური სპეკულაციების გაგრძელება", - აღნიშნა პრემიერმა.
მისივე თქმით, საქართველოს აქვს სტრატეგიული ურთიერთობა აზერბაიჯანთან, ასევე, კომპანია "სოკართან" და სტრატეგიულ ურთიერთობებს "არაფერი არ ემუქრება".