"მაესტროს" გადაყენებული დირექტორი ბაია გადაბაძე აცხადებს, რომ "იმედის" ფაქტობრივი მმართველი ირაკლი რუხაძე "მაესტროს" ხელში ჩასაგდებად კოტე გოგელიას ჯერ კიდევ 2015 წლის მაისში დაუკავშირდა,
დღეს გამართულ პრესკონფერენციაზე მან წარმოადგინა მიმოწერა, რომლის თანახმადაც რუხაძეს 7 მილიონ ნახევარ დოლარად სურდა "მაესტროს" შინაარსის, მათ შორის ლიცენზიებისა და სიხშირეების შეძენა.
,,რუხაძე სთავაზობდა მაკა ასათიანს გარიგებას და იხდიდა 7 მილიონნახევარ დოლარს. კერძოდ, მას აინტერესებდა არა კომპანიის წილები, არამედ ბრენდი "მაესტრო", ასევე ლიცენზიები და სიხშირეები. იგი ამ თანხას იხდიდა შინაარსში და არა მატერიალურ ღირებულებებში.. ეს გარიგება არ შედგა, თუმცა ამ ხნის განმავლობაში არაერთი შეთავაზება იყო”, - განაცხადა გადაბაძემ.
მისი თქმით, მაკა ასათიანმა გაითვალისწინა პარტნიორების ინტერესბი და გარიგებაში მონაწილეობა არ მიიღო.
,,თუკი მაკა ასათიანი გაასხვისებდა აქტივებს, ის "გადააგდებდა" დანარჩენ პარტნიორებს. ამ დროის განმავლობაში უცვლელად იყო შეთავაზება, თუმცა მაკა ასათიანმა რომ არ დათმო, ირაკლი რუხაძემ გამოიყენა გიორგი გაჩეჩილაძის 35%-იანი წილი", - აღნიშნა გადაბაძემ.
მისივე ინფორმაციით, შემდგომში, 2016 წლის 15 იანვარს "მაესტროს" უკვე ყოფილმა პარტნიორებმა ლევან ჩიკვაიძემ და გიორგი ებრალიძემ წერილი გაუგზავნეს დანარჩენ პარტნიორებს და
შესთავაზეს მათი წილები ორნახევარ მილიონად სამ დღეში ეყიდათ, წინააღმდეგ შემთხვევაში , ისინი აპირებდნენ გასხვისებას მესამე პირზე.
გადაბაძის მტკიცებთ, სინამდვილეში მათ გამზრახული ჰქონდათ წილების გასხვისება გაჩეჩილაძეებზე და თანხის გადამხდელი იქნებოდა რუხაძე.
,,სწორედ ამ ჩარევების გამო დაეკარგა მაკა ასათიანს მოტივაცია და იგი გადავიდა ნაწილობრივ დაფინანსებაზე, რის შემდეგაც იძულებული იყო სასამართლოსთვის გაკოტრების შესახებ მიემართა”, - განაცხადა გადაბაძემ.