ადამიანის უფლებათა დაცვის კომიტეტის თავმჯდომარე ეკა ბესელია აცხადებს, რომ სხვისი რელიგიური უფლებების პატივისცმას ევროპული კონვენციაც გულისხმობს. დეპუტატმა ამის შესახებ ,,ადმინისტრაციულ სამართალდარღვევათა კოდექსში" შესატან ცვლილებასთან დაკავშირებით, გამოთქმული კრიტიკის საპასუხოდ განაცხადა.
,,თუ ვინმეს ჰგონია, რომ ადამიანის უფლებების დაცვა მხოლოდ გამოხატვის თავისუფლებაა, მე ვთხოვდი ყველას, რომ წაიკითხონ ევროპული კონვენცია, როგორც მე-8, ასევე მე-9 და მე-10 მუხლები. ყველა ნახავს, რომ ადამიანის დაცვის სტანდარტი გულისხმობს როგორც სხვისი აზრის პატივისცემას, ასევე სხვისი რელიგიური უფლებების პატივისცმასაც. ყველა ქმედება არ უნდა იყოს დასჯადი, არამედ ისეთი ქმედება, რომელიც განზრახ შეურაცხყოფს სხვათა რელიგიურ უფლებებს იმგვარი ფორმით, რომელიც საჯარო ინტერსებს უქმნის საფრთხეს. ეს ფორმულირება არის დასახვეწი, ჩამოსაყალიბებელია. ერთი უფლების დაცვა, მეორის უფლებების დარღვევის ხარჯზე არ შეიძლება ხდებოდეს. ასევე უნდა ვცეთ პატივი სხვის აზრს, როგორც სხვის რელიგიურ გრძნობებს. ბალანსი უნდა იყოს დაცული", - განაცხადა ეკა ბესელიამ და დასძინა, რომ სწორედ ეს თქვა კომიტეტმა თავის დასკვნაში.
შეგახსენებთ, პარლამენტის ადამიანის უფლებათა დაცვისა და სამოქალაქო ინტეგრაციის კომიტეტმა პირველი მოსმენით განიხილა და მხარი დაუჭირა დეპუტატ სოსო ჯაჭვლიანის მიერ ინიცირებულ კანონპროექტს, რომლის თანახმადაც, "რელიგიური გრძნობების შეურაცხყოფა" დასჯადი ხდება. კომიტეტზე განხილვისას, კანონპროექტში შესწორებები შევიდა და შემდეგი ფორმულირება მიიღო - "პირის რელიგიური გრძნობების შეურაცხყოფა გამოიწვევს დაჯარიმებას 300 ლარის ოდენობით, ხოლო განმეორების შემთხვევაში ჯარიმა 600 ლარია. რელიგიური სიწმინდეების და საკულტო ნაგებობების წაბილწვა 500 ლარით დაჯარიმებას გამოიწვევს".
კანონპროექტის ავტორია დემოგრაფიული განვითარების ფონდის დირექტორი ზვიად ტომარაძე, ხოლო ინიციატორი - სოსო ჯაჭვლიანი. განმარტებითი ბარათის თანახმად, "რამდენიმე წელია, სიტყვისა და გამოხატვის თავისუფლების საბაბით პერიოდულად ხდება ფარული თუ პირდაპირი შეურაცხყოფა როგორც საქართველოს მართლმადიდებლური ეკლესიის, ასევე, ქვეყანაში არსებული სხვადასხვა ტრადიციული რელიგიის მიმართ. გაურკვეველი ჯგუფები და პიროვნებები მიზანმიმართულად ახორციელებენ რელიგიური სიწმინდეების, ნაგებობების და სიმბოლოების შეურაცხყოფას. სოციალურ ქსელში შექმნილია რამდენიმე ათეული გვერდი, რომელთა პირდაპირი დანიშნულებაა ღვთის გმობა, მართლმადიდებლური ეკლესიის, მისი წინამძღოლისა და იერარქების შეურაცხყოფა. 2012 წლის 9 სექტემბერს გაურკვეველმა პირებმა ქაშუეთის ეკლესიის გალავანზე დახატეს წმინდა ნინოს კარიკატურა წარწერით: Pussy Riot".
