შეწყალების კომისიის ყოფილი თავმჯდომარე ალეკო ელისაშვილის განცხადებით, ,,თავისუფალი დემოკრატები“ პარლამენტში საგამოძიებო კომისიის შექმნის საკითხვს დასვამენ.
ფრაქციის წევრებს ელისაშვილი დახურულ ფორმატში იმ ბრალდებებთან დაკავშირებით შეხვდა, რომელსაც შეწყალების კომისიის ხელმძღვანელობის პერიოდ უკავშირებს.
"შევთანხმდით მჭიდრო თანამშრომლობაზე. აღნიშნულ საკითხთან დაკავშირებით რამდენიმე მოსაზრება კიდევ უნდა გავცვალოთ. გვაქვს პრინციპული თანხმობა იმასთან დაკავშირებით, რომ "თავისუფალი დემოკრატების" ფრაქცია უახლოეს მომავალში დასვამს კომისიის შექმნის საკითხს და ამისთვის ძალიან მადლობელი ვარ", - განუცხადა ჟურნალისტებს ელისაშვილმა შეხვედრის დასრულების შემდეგ.
რაც შეეხება მის პოლიტიკურ მიზნებს, ელისაშვილის განცხადებით, პოლიტიკური მიზნები აქვს, თუმცა, ის არც საპარლამენტო და არც საპრეზიდენტო არჩევნებში მონაწილეობას არ აპირებს.
მისი მტკიცებით, „ნაციონალურ მოძრაობასთან“ მისი კავშირი გამორიცხულია.
„როცა „ნაციონალურ მოძრაობა“ ხეირის მატარებელი იყო, მას მაშინ არ ვეკარებოდი და ვაკრიტიკებდი და ახლა დამარცხებულ, დაქსაქსულ პარტიაში შევალ? არცერთ პარტიაში შესვლას არ ვაპირებ. არჩეული დეპუტატი ვარ და ვმუშაობ იქ, სადაც ვარ.
მანანა კობახიძეს ურჩევნია, წავიდეს და საკუთრი ტელეფონი ექსპერტიზისთვის პროკურატურაში მიიტანოს. ასევე, კარგი იქნება, თუკი, facebook-თან დაკავშრებით ჩამოყალიბდება - გაუტეხეს, თუ სტატუსი მისი დაწერილია?“, - აღნიშნა ელისაშვილმა.
ვიცე-სპიკერმა მანანა კობახიძემ დღეს განაცხადა, რომ ელისაშვილს ,,თავისუფალ დემოკრატებში“ გაწევრიანების სურვილი აქვს.
