საპარლამენტო უმრავლესობის წევრი კარლო კოპალიანი მოითხოვს, რომ რელიგიური გრძნობების შეურაცხყოფისთვის ჯარიმა გაიზარდოს და სისხლის სამართლებრივად დასჯადიც გახდეს. მისი თქმით, საქართველოში მართლმადიდებლურ ეკლესიაზე დიდი შეტევაა და შესაბამისად ის ჯარიმები, რომელიც კანონპროექტით არის მოცემული საკმარისი არ არის.
"დიდი შეტევაა ჩვენს პატრიარქზე, მართლმადიდებლურ ეკლესიაზე. შეიძლება ითქვას ჩვენს ქვეყანაში ყველაზე დაუცველი, ყველაზე მრავალრიცხოვანი ჩვენი მართლმადიდებელი ეკლესია გახლავთ. მე მიაჩნია, რომ ძალიან მცირეა ეს ჯარიმები. ათეისტური შეხედულების პიროვნებები გამოხატავენ თავიანთ აზრს, ესენი არ არიან საშიშები. ესენი არიან ერთეულები და ძალიან დელიკატურად ამბობენ ამას, მაგრამ ადამიანები, რომლებიც ებრძვიან ჩვენს მართლმადიდებლობას, თუნდაც სხვადასხვა რელიგიური მიმდინარეობებს, ესენი არიან ორგანიზაციები, ძალიან მოწესრიგებული, თავიანთი გეგმით და შეხედულებით. მიმაჩნია ეს ორგანიზაციები ამ 500 და 1000 ლარს დიდი სიამოვნებით გადაიხდიან, ოღონდ ჩვენს პატრიარქს და ეკლესიას აგინონ და რაც შეიძლება მეტი ბოღმა ანთხიონ ჩვენს საზოგადოებაში. ამიტომ ვთვლი, რომ ამ ჯარიმებს რაც აქ წერია, თითო ნული უნდა მიემატოს აუცილებლად. მიმაჩნია ეს უნდა გამკაცრდეს როგორც სისხლის სამართლის კოდექსში, ასევე ადმინისტრაციულ სამართალდარღვევათა ნაწილში", - აღნიშნა კარლო კოპალიანმა.
ცნობისთვის, აღნიშნული კანონპროექტის თანახმად, რელიგიური სიწმინდეების, რელიგიური ორგანიზაციის, ღვთისმსახურის და მორწმუნის მიმართ სიძულვილის საჯაროდ გამოხატვა ან/და ისეთი მასალის გამოქვეყნება ან ჩვენება, რაც მიზნად ისახავს მორწმუნეთა გრძნობების შეურაცხყოფას - გამოიწვევს დაჯარიმებას 300 ლარის ოდენობით. იგივე ქმედების განმეორებით ჩადენის შემთხვევაში, ჯარიმა 600 ლარამდე გაიზრდება. ამასთან, რელიგიური შენობების და სხვა რელიგიური სიწმინდეების წაბილწვა, მასზე ნებისმიერი წარწერის გაკეთება ან დაზიანება გამოიწვევს დაჯარიმებას 500 ლარის ოდენობით. იგივე ქმედების განმეორების შემთვევაში კი, ჯარიმა 1000 ლარი იქნება. კანონპროექტის ინიციატორი საპარლამენტო უმრავლესობის წევრი სოსო ჯაჭვლიანია .
მასალის გამოყენების პირობები