პრეზიდენტის მრჩეველი ადამიანის უფლებათა საკითხებში, კახა კოჟორიძე მიიჩნევს, რომ პრეზიდენტის საძრახის კამპანიაში დადანაშაულების შემდეგ იუსტიციის უმაღლესი საბჭოს წევრებთან კონსტრუქციული დიალოგი შეუძლებელია.
"მაშინ, როცა მოსამართლეთა კონფერენციამ მიიღო განცხადება და დღეს მას იუსტიციის უმაღლესი საბჭო შეუერთდა, სადაც ითქვა, რომ თურმე საქართველოს პრეზიდენტი არის საძრახის კამპანიაში ჩართული, რათა აწარმოოს კამპანია იუსტიციის უმაღლესი საბჭოს წინააღმდეგ, არა მგონია, ამის მერე საბჭოს მხრიდან კიდევ რელევანტური იყოს კონსტრუქციულ დიალოგზე საუბარი", - განაცხადა კოჟორიძემ.
როგორც მან ჟურნალისტებთან საუბარში აღნიშნა, პრეზიდენტი ყოველთვის უჭერდა და უჭერს მხარს სასამართლო დამოუკიდებლობასა და მიუკერძოებლობას, თუმცა არა უპირობოდ.
კოჟორიძის განმარტებით, იმაზე, რომ იუსტიციის უმაღლესი საბჭოს საქმიანობა პრობლემურია, მხოლოდ საქართველოს პრეზიდენტი და პარლამენტის თავმჯდომარე, ასევე არასამთავრობო სექტორი და ადვოკატთა ასოციაცია არ საუბრობენ, არამედ ამაზე მიუთითებენ სახალხო დამცველი და ადამინის უფლებათა დაცვის საკითხებში ევროკომისარიც.
"თუ წარმოჩინდება ისე, რომ ყველა მათგანი ებრძვის იუსტიციის უმაღლეს საბჭოს და მხოლოდ ისინი არიან სწორი პოზიციის მქონენი, ეს არ იქნება თვითკრიტიკული დამოკიდებულება, ეს არ იქნება პრობლემის გადაწყვეტაზე ორიენტაცია, ეს იქნება ორიენტაცია იქითკენ, რომ ვაკრიტიკოთ და დავინახოთ არა პრობლემა, არამედ ის ადამიანები, რომლებიც ამ პრობლემაზე საუბრობენ", - დასძინა კოჟორიძემ.