საქართველოს პრემიერ-მინისტრი რუსეთის საგარეო საქმეტა მინისტრის განცხადებებს ეხმიანება და აღნიშნავს, რომ რუსეთთან დიპლომატიური ურთიერთობების აღდგენას აქვს მნიშვნელოვანი წინაპირობები. გიორგი კვირიკაშვილის თქმით,
დიალოგი ყველა შემთხვევაში აუცილებელია და ამ საკითხზე უახლოეს მომავალში გაკეთდება კომენტარები.
,,დიპლომატიური ურთიერთობების აღდგენას აქვს მნიშვნელოვანი წინაპირობები, ეს არის საქართველოს ტერიტორიული მთლიანობის და კიდე უფრო მნიშვნელოვანი სუვერენიტეტის ანუ ყველა სუვერენული გადაწყვეტილების პატივისცემა, რომელსაც საქართველოს ხელისუფლება საქართველოს ხალხთან ერთად იღებს. რაც შეეხება იმას თუ რა განცხადებები გაკეთდა ამას გარდა, მე მინდა, რომ პოზიტივზეც ვისაუბრო, რომ ვიზების შემსუბუქება უკანასკნელ პერიოდში იყო ძალიან პოზიტიური გადაწყვეტილება, თუმცა, რა თქმა უნდა, პანკისის ხეობასთან გაკეთებულ განცხადებასთან დაკავშირებით ვიტყვი აუცილებლად, რომ საქართველოს მთავრობა ახორციელებს სრულ კონტროლს, არანაირი ტერორისტული რისკი დღესდღეობით პანკისის ხეობიდან არ მომდინარეობს. დიალოგი აუცილებელია ყველა შემთხვევაში, დიალოგისთვის ჩვენ გვაქვს გარკვეული არხები, ამ საკითხს, ჩვენ რა თქმა უნდა, განვიხილავთ და უახლოეს მომავალში გაკეთდება კომენტარები» , - აღნიშნა პრემიერმა.
შეგახსენებთ, რუსეთის საგარეო საქმეთა მინისტრმა, სერგეი ლავროვმა წლის შემაჯამებელ პრესკონფერენციაზე დღეს განაცხადა, რომ საქართველო-რუსეთის ურთიერთობა ღრმა კრიზისიდან გამოდის.
მისი თქმით, რუსეთი მზად არის საქართველოსთან უვიზო რეჟიმი შემოიღოს, თუმცა დიპლომატიური ურთიერთოების არარსებობის პირობებში ეს უცნაურად ჟღერს. ლავროვმა ასევე განაცხადა, რომ ,,ისლამური სახელმწიფოს“ მებრძოლების მომზადება პანკისის ხეობაში ხდება.
