პრემიერის სპეციალური წარმომადგენლის რუსეთთან ურთიერთობის საკითხებში ზურაბ აბაშიძის განცხადებით, სანამ საქართველოს ტერიტორიული მთლიანობა დარღვეულია, რუსეთთან დიპლომატიური ურთიერთობის აღდგენა შეუძლებელია.
,,ჩვენმა რუსმა კოლეგებმა კარგად იციან, სანამ დარღვეულია საქართველოს ტერიტორიული მთლიანობა, დიპლომატიური ურთიერთობის აღდგენა შეუძლებელია.მაგრამ, თუკი მოხდება ძალიან სერიოზული წინსვლა ამ მიმართულებით და ჩვენ დავინახავთ, რომ არის ძალიან მნიშვნელოვანი პროგრესი, ალბათ ეს საკითხი დღის წესრიგში დადგება”, - განაცხადა აბაშიძემ.
მისივე თქმით, სავიზო რეჟიმის გაუქმებისთვის, დიპლომატიური ურთიერთობა არანაირი ხელისშემშლელი ფაქტორი არ არის.
,,რუსეთის მხარემ მნიშვნელოვნად გაამარტივა სავიზო რეჟიმი. ახლა საუბარი იყო სავიზო რეჟიმის საერთოდ გაუქმებაზე. ეს ჩვენ მოვისმინეთ პრეზიდენტ პუტინისგან, შემდგომ საგარეო უწყებამაც დაადასტურა. დავუკვირდეთ მოვლენებს და ყველაფერი გამოჩნდება“, - აღნიშნა აბაშიძემ.
შეგახსენებთ, რუსეთის საგარეო საქმეთა მინისტრმა, სერგეი ლავროვმა წლის შემაჯამებელ პრესკონფერენციაზე დღეს განაცხადა, რომ საქართველო-რუსეთის ურთიერთობა ღრმა კრიზისიდან გამოდის.
მისი თქმით, რუსეთი მზად არის საქართველოსთან უვიზო რეჟიმი შემოიღოს, თუმცა დიპლომატიური ურთიერთოების არარსებობის პირობებში ეს უცნაურად ჟღერს.