ახალგაზრდა იურისტთა ასოციაციის“ თავმჯდომარე ანა ნაცვლიშვილი პრემიერისა და არასამთავრობოების შეხვედრას ცალსახად დადებითად აფასებს. მისივე თქმით, კარგი იქნება თუ ასეთი შეხვედრები სისტემატური იქნება.
„შეხვედრების მზაობა, პრემიერმა გამოთქვა. მან თქვა, რომ რამდენიმე თემატურ საკითხთან დაკავშირებითაც უნდა, ასეთი ტიპის შეხვედრები გაგრძელდეს და ჩვენი მხრიდანაც არის აბსოლუტური მზაობა იმისთვის, რომ ის ინფორმაცია რაც გვაქვს და ასევე, ის რეკომენდაციები - მწვავე პრობლემები როგორ შეიძლება მოგვარდეს ქვეყანაში, მას მივაწოდოთ მუდმივ რეჟიმში.
ასე რომ, შეხვედრას ცალსახად დადებითად ვაფასებ, უბრალოდ, კარგი იქნება თუ მას ექნება სისტემატური ხასიათი და იქნება თემატური მიმართულებებით, რომ შევძლოთ სიღრმეებში ჩასვლა“, - განაცხადა ნაცვლიშვილმა.
მისივე თქმით, შეხვედრაზე დაისვა ინსტიტუციური რეფორმების გაგრძელების და სწრაფად გატარების საკითხიც.
,,რა თქმა უნდა, დაისვა ინსტიტუციური რეფორმების გაგრძელების და სწრაფად გატარების მნიშვნელობა. ის დაგვეთანხმა, რომ ძალიან მნიშვნელოვანია სასამართლოში მიმდინარე მოვლენები და თქვა, რომ ამ საკითხს უნდა მიექცეს ძალიან მაღალი დონის ყურადღება. მან ასევე თქვა, რომ შინაგან საქმეთა სამინისტროსა და პროკურატურის რეფორმების მიმართულებით მუშაობა გასაგრძელებელია და რომ მნიშვნელოვანი ნაბიჯებია გადასადგმელი“, - განაცხადა ნაცვლიშვილმა.
მთავრობის ადმინისტრაციაში პრემიერ-მინისტრი გიორგი კვირიკაშვილი 20-მდე არასამთავრობო ორგანიზაციის წარმომადგენლებს შეხვდა.
