საპარლამენტო უმრავლესობის ერთ-ერთი ლიდერი, გია ვოლსკი, აცხადებს, რომ ამ ეტაპზე „არავინ იცის, ვის უარი ეთქვა მაჟორიტარობაზე, ვინ ვის ჩაანაცვლებს და ვინ იქნება მაჟორიტარობის კანდიდატი“. ამის შესახებ გია ვოლსკიმ ჟურნალისტებთან მას შემდეგ ისაუბრა, რაც „ჯი-ეიჩ-ენ“-მა წყაროზე დაყრდნობით გაავრცელა ინფორმაცია, რომ მომავალი არჩევნებში, ტყიბულში, ელისო ჩაფიძეს ოთარ აბესაძე ჩაანაცვლებს.
“ოთარ აბესაძისა და ელისი ჩაფიძის კანდიდატურების ასეთ კონტექტში გაანალიზება უაზრობაა. ამ თემაზე საუბარი არ ყოფილა. ასე რომ, ვფიქრობ, ყველაფერი მიმართულია იქეთკენ, რომ წინასაარჩევნოდ იყოს მეტი სკანდალი და დუღილის მეტი ტემპერატურა. ყველა საკითხი კომპლექსურად უნდა გადაწყდეს. მხოლოდ ამის შემდეგ იქნება შესაძლებელი კონკრეტულ პირებზე საუბარი,“ - განაცხადა გია ვოლსკიმ.
აღსანიშნავია, რომ საარჩევნო რეფორმის განხორციელების შემთხვევაში, რომელიც ოლქების ახლებურ გადანაწილებას ითვალისწინებს, ტყიბულისა და თერჯოლის ოლქები ერთიანდება და ერთი მაჟორიტარი ეყოლება.