საქართველოს პრემიერ-მინისტრი ეროვნული ვალუტის მორიგ გაუფასურებას ლარის კურსის კორექტირებას უწოდებს, რაც გიორგი კვირიკაშვილის შეფასებით, მეზობელ ქვეყნებში არსებული ვითარებიდან გამომდინარეობს.
„ეს არის კორექტირება ლარის კურსის იმ დევალვაციასთან მიმართებაში, რომელიც გასულ დღეებში მოხდა ჩვენს მეზობელ ქვეყნებში. აქ არაფერი საგანგაშო არ არის. ჩვენ ნამდვილად გვაქვს ყველა მიზეზი იმისათვის, რომ ოპტიმისტურად ვიყოთ განწყობილი იმისათვის, რომ საქართველოში წელს იქნება საკმაოდ კარგი ეკონომიკური ზრდა და ჩვენ არ გაქვს საფუძველი, რომ რაიმე ნეგატიური დავინახოთ საშუალო და გრძელვადიან პერსპექტივაში,“ - განაცხადა გიორგი კვირიკაშვილიმა დავოსში, ეკონომიკური ფორუმის დასრულების შემდეგ.
შეგახსენებთ, საქართველოს ეროვნულმა ბანკმა ლარის ახალი გაცვლითი კურსი გამოაქვეყნა, რომლის მიხედვითაც ხვალიდან ერთი აშშ დოლარის შესაძენად 2.4694 ლარი იქნება საჭირო. ამ დრომდე არსებული კურსით, ეს ციფრი 2.4445-ს შეადგენდა.
ლარი გაუფასურდა ევროსთან მიმართებაშიც და ხვალიდან ერთი ევროს ღირებულება 2.6766 ლარი იქნება. დღევანდელი კურსით კი მისი ყიდვა 2.6635 ლარად არის შესაძლებელი.
სებ-ის მიერ დადგენილი კურსის პარალელურად, აშშ დოლარის ღირებულება იმატებს კომერციულ ბანკებში, ზოგან 1 აშშ დოლარის ფასი 2.50-ს აჭარბებს.
ცნობილია, რომ ლარის არსებობის ისტორიაში ყველაზე უარესი გაცვლითი კურსი აზიის ფინანსური კრიზისის გამო, 1999 წლის 8 მარტს იყო, როდესაც ერთი აშშ დოლარი 2.45 ლარი ღირდა. 2015 წლის 21 სექტემბერს კი, ერთი ამერიკული დოლარი 2.45-ზე 0.0001 თეთრით ნაკლები ღირდა. შესაბამისად, ლარი დღეს რეკორდულად გაუფასურდა.