საქართველოს ენერგეტიკის მინისტრი კახა კალაძე ,,გაზპრომთან“ დაკავშირებით ავსტრიაში გამართულ შეხვედრაზე საუბრობს და აცახადებს, რომ საერთო შეთანხმება ჯერ მიღწეული არ არის. მისი თქმით, ,,გაზპრომთან“ ქართულ მხარეს თავისი მოთხოვნები აქვს და უნდა მიიღოს იგივე შედეგი, რასაც იღებდა ნედლეულის მიღების შემთხვევაში.
,,ავსტრიაში შეხვედრას რაც შეეხება, გაზპრომთან მოლაპარაკებები ისევ გრძელდება, ჯერ საერთო შეთანხმებას ვერ მივაღწიეთ. ჩვენ, ქართულ მხარეს გვინდა, მივიღოთ ისევ ის შედეგი, რასაც ვიღებდით მოცულობების მიღების შემთხვევაში და ვფიქრობ, უახლოეს მომავალში, ალბათ, დავასრულებთ მოლაპარაკებებს. არ ვიცი, ამას გინდათ ულტიმატუმი დავარქვათ, გინდ მოთხოვნა დავარქვათ, საუბარი მიმდინარეობს იმაზე, რომ მოხდეს გატარების თანხობრივი ანაზღაურება. რა თქმა უნდა, აქედან გამომდინარე, ჩვენ - ქართულ მხარეს, გვაქვს სურვილი და გვინდა, რომ ჩვენ მივიღოთ იგივე შედეგი, რასაც ვიღებდით ნედლეულის მიღების შემთხვევაში და ასევე, გვქონდეს შესაძლებლობა, საჭიროების შემთხვევაში, წამოვიღოთ იმდენი მოცულობის ბუნებრივი აირიც, რამდენიც იქნება მოთხოვნა”, - განაცხადა მინისტრმა.
კახა კალაძე დღეს საქართველოში ევროკავშირის წარმომადგენლობის ხელმძღვანელს იანოშ ჰერმანს შეხვდა, სადაც უწყების ინფორმაციით, საუბარი შეეხო საქართველო-ევროკავშირს შორის ასოცირების შესახებ ხელშეკრულებით გათვალისწინებული და ენერგეტიკულ სექტორში დაგეგმილი ღონისძიებების მიმდინარეობას, აგრეთვე რეგიონალური და საერთაშორისო მნიშვნელობის მსხვილი ინფრასტრუქტურული პროექტების მხარდაჭერასა და სხვა მიმდინარე საკითხებს.