თბილისის მერი დავით ნარმანია და "თბილისის მეწარმეობის ხელშეწყობის ცენტრის" ხელმძღვანელი ალექსანდრე მარგიშვილი ჯოკია ბოდოკიას მიერ დღეს გაკეთებულ განცხადებას ეხმაურებიან. მათ კომენტარებს მერიის პრესსამსახური ავრცელებს.
"როგორც ხედავთ, ჩვენი ხელისუფლების პირობებში კანონი უზენაესია და კორუფცია ვერ იარსებებს, სწორედ ამის დასტურია ჯოკია ბოდოკიას მაგალითიც, რომელმაც ახლაც ვნახეთ, რომ გადაწყვიტა, ვიღაცის დაწერილი ტექსტი წაეკითხა. ერთი რამ შემიძლია დანამდვილებით გითხრათ, რომ ვერც ამ სახის აბსურდებით და ვერც რაიმე სახით ყურადღების გადატანით, კორუფციის მიმართ ჩვენი ხელისუფლების მიდგომა არ შეიცვლება",- განაცხადა დავით ნარმანიამ.
"მე კულტურის მინისტრის მოადგილედ ვიმუშავე 2012 წლის ოქტომბრიდან 2014 წლის აგვისტომდე. ამ პერიოდში კულტურის სამინისტროში არანაირი წერილი ან მომართვა პანორამა თბილისთან დაკავშირებით არ შემოსულა. ახლა, როგორც მოვიკითხე, პირველი წერილი შესული არის 2014 წლის ოქტომბერში და ისიც არა სამინისტროში, არამედ სამინისტროს დაქვემდებარებულ - ძეგლთა დაცვის სააგენტოში. შესაბამისად, არანაირი შეხება მე პანორამა თბილისთან კულტურის სამინისტროში მუშაობის დროს არ მქონია. ყველაფერს რომ თავი დავანებოთ, რიცხვებში ვერ ემთხვევიან მსჯავდებულის ჩვენების დამწერნი.
მას შემდეგ 2014 წლის აგვისტოდან მე გახლდით თბილისის ვიცე-მერი. ამ პერიოდში მე არქიტექტურულ საკითხებს, ქალაქგეგმარებას არ ვკურირებდი, შესაბამისად არც მაშინ არანაირი შეხება ამ პროექტის განხილვასთან, ან რაიმე პოზიციის შემუშავებასთან, თუ გახმოვანებასთან არ მქონია. შესაბამისად, მსჯავრდებულის დამცველებმა ფაქტობრივად არასწორი და რეალობას აბსოლუტურად აცდენილი სტრატეგია აირჩიეს",- განაცხადა ალექსანდრე მარგიშვილმა.
მერიის ზედამხედველობის სამსახურის აპარატის ყოფილმა უფროსმა, ჯოკია ბოდოკიამ სააპელაციო სასამართლოში გამართულ სხდომაზე განაცხადა, რომ ბიძინა ივანიშვილი დავით ნარმანიასა და ალექსანდრე მარგიშვილის წინააღმდეგ, "პანორამა თბილისის" გამო განეწყო.
მისი თქმით, ივანიშვილმა მარგიშვილის დაკავებაც კი მოითხოვა, რადგან "პანორამა თბილისზე" უარყოფითი დასკვნის ერთ-ერთი ავტორი იყო.
,,ივანიშვილმა ნარმანიას მარგიშვილის გათავისუფლება მოსთხოვა. ნარმანია ივანიშვილს შეეწინააღმდეგა, რის შემდეგაც ივანიშვილს თამაშში შეჰყავს შს სამინისტრო გომელაურის ხელმძღვანელობით და მთავარი პროკურორის მოადგილე ირაკლი შოთაძე. მათ დაევალათ მარგიშვილის პასუხისგებაში მიცემა. დაიწყო ჩემი ხელმძღვანელის გეგი ნიჟარაძის დაბარება კვირაში 3-4-ჯერ მოდულის შენობაში. რამდენჯერმე იგი მეც მივიყვანე იქ. გააქტიურდა აგენტურული მუშაობა, მათ შორის ჩემთან მიმართებაში. ამ საქმეში აქტიურ მონაწილეობას ღებულობდა "ქართული ოცნებიდან" საკრებულოს დეპუტატი მალხაზ მჭედლიშვილი, რომელიც იმჟამინდელი სუს-ის ხელმძღვანელის, მირიან მჭედლიშვილის ძმაა", - განაცხადა ბრალდებულმა.
მისივე თქმით, შუამავლები მისგან მარგიშვილის წინააღმდეგ ჩვენებას მოითხოვდნენ, ერთ-ერთ შუამავლად ბოდოკიამ თავისი იმდროინდელი ადვოკატი გიორგი ყავლაშვილი დაასახელა. ბრალდებულის განცხადებით, მარგიშვილის დადანაშაულების შემთხვევაში მას საპროცესო გარიგებას და 5 ათასიან ჯარიმას გაუფორმებდნენ.
,,ვუთხარი, რომ მარგიშვილზე არაფერი ვიცოდი და რაღა უნდოდათ, ის ხომ მოხსნეს და მიზანი მიღწეული იყო. ადვოკატმა მითხრა, ის მოითხოვს, რომ დაიჭირონო. ვინ ის, კაცი შუშის სასახლიდანთქო? - ვკითხე და ხმამაღალი ხმით გადაფარა ჩემი ხმა და მითხრა, კედლებს აქაც ყურები აქვსო", - განაცხადა ჯოკია ბოდოკიამ.
თბილისის საქალაქო სასამართლომ ქრთამის მოთხოვნისა და მიღების ფაქტზე ბრალდებული ჯოკია ბოდოკია 2015 წლის 4 ნოემბერს დამნაშავედ სცნო. სასამართლომ მას თავისუფლების აღკვეთა 11 წლით განუსაზღვრა.
