განათლების მინისტრის თამარ სანიკიძის განმარტებით, ერაყელი სტუდენტებს ბინადრობის მოწმობის აღების დროს გარკვეული ხარვეზები ჰქონდათ. მისი თქმით, ხარვეზები საკანონმდებლო ჩარჩოდან გამომდინარეობს.
,,ერაყელ სტუდენტებს ბინადრობის მოწმობის აღების დროს დაუფიქსირდათ გარკვეული ხარვეზები. ხარვეზები აბსოლუტურად გამომდინარეობს საკანონმდებლო ჩარჩოდან. ასევე, მათ დადგენილი პროცედურებით გასავლელი ჰქონდათ ის უსაფრთხოების ნორმები, რომლებიც ასევე კანონით არის დადგენილი. შესაბამისად, მათ ამ ეტაპზე ვერ მიიღეს ბინადრობის მოწმობა.
რაც შეეხება მათ შემდგომ ქმედებას, რა შეუძლიათ, რომ გააკეთონ - ასევე კანონით არის დარეგულირებული ის პროცედურები, რომლებიც მათ სასამართლოს გზით უნდა გაიარონ, შესაბამისად, მათ აქვთ ყველანაირი უფლება, მიმართონ სასამართლოს ან, თუ რაიმე დამატებითი დოკუმენტაციის წარდგენა შეუძლიათ იმისთვის, რომ ბინადრობის მოწმობა მიიღონ, ამის საშუალებაც ექნებათ.
როგორც სტუდენტებს, შეუძლიათ, გარკვეული პერიოდით სტატუსი შეიჩერონ, სანამ პრობლემები გადაწყდება. ვადევნებთ ნამდვილად პროცესს თვალყურს პირველი დღიდან, ჩვენ გვაინტერესებს, რომ ყველა სტუდენტის უფლება იყოს დაცული, თუმცა, ძირითადი საკანონმდებლო ჩარჩოდან ნამდვილად არ უნდა გამოვიდეთ.
შეგახსენებთ, აკაკი წერეთლის სახელობის ქუთაისის სახელმწიფო უნივერსიტეტის ერაყელ სტუდენტებს საქართველოში ბინადრობის უფლება შეუჩერდათ, რის გამოც მათ რამდენიმე დღის წინ საპროტესტო აქცია გამართეს.
