დეფაქტო ცხინვალში მოქმედი პოლიტიკური გაერთიანების, “ერთიანი ოსეთის” ლიდერი ანატოლი ბიბილოვი ირწმუნება, რომ მისმა პარტიამ იტალიურ საპარლამენტო პარტია “ჩრდილოეთის ლიგასთან” თანამშრომლობა დაიწყო. როგორც გამოცემა “სპუტნიკ ოსეტია” იტყობინება, ბიბილოვი მილანში “ლეგა ნორდის” შტაბ-ბინაშიც იმყოფებოდა და იტალიელ კოლეგებთან შეხვედრაც გამართა. “ჩრდილოეთის ლიგა” ოპოზიციური საპარლამენტო გაერთიანებაა, რომელიც დამოუკიდებელი სახელმწიფოს, პადანიას შექმნის ინიციატივით გამოდის. როგორც ბიბილოვი აცხადებს, “ჩრდილოეთის ლიგა” უახლოეს მომავალში იტალიის პარლამენტში სამხრეთ ოსეთის დამოუკიდებლობის აღიარების ინიციატივასაც დააყენებს.
