ღარიბაშვილი რაღაცას ცდილობს, მაგრამ ბოლომდე ვერ ბედავს" - ამის შესახებ სალომე ზურაბიშვილმა განაცხადა. საქართველოს მეხუთე პრეზიდენტმა ირაკლი ღარიბაშვილის მიერ გავრცელებულ წერილებზე Facebook live-ში ისაუბრა, სადაც მოქალაქეების კითხვებს პასუხობს.
მისი თქმით, ექსრეპმიერი სასამართლო სისტემასა და კორუფციაზე მხოლოდ მას შემდეგ ალაპარაკდა, რაც პრობლემები პირადად მას შეეხო.
"რა ვთქვა, კარგი დროა ახლა რომ ამხილა სასამართლო, რამდენი ხანია, რომ არა მხოლოდ ჩვენ აქ, ჩვენი პარტნიორები, რამდენჯერ მოისმინა თვითონ ბატონმა ღარიბაშვილმა ჩვენი ევროპელი პარტნიორებისგან, მათი შენიშვნები ჩვენ სასამართლოზე და მაშინ ამართლებდა ამ ყველაფერს და დღეს თურმე ამხილა იმიტომ, რომ მას შეეხო. ესეც იგივე თემაა, რასაც ვეხებოდი მანამდე, სანამ ადამიანებს რაღაც უშუალოდ არ ეხებათ, მანამდე ან თვალს ხუჭავენ, ან ითმენენ, ან სხვაგან იყურებიან და ასეთი იყო ღარიბაშვილის პოზიცია ზუსტად.
კორუფცია ხან აღიარა, ხან არ აღიარა, მე ვეღარ გავიგე ზუსტად რა ხდება ამ მიმართულებით. ებრძვის, იბრძვის, გადავედი ბრძოლაზე, მაგრამ ვის ებრძვის ესეც გაუგებარია, ებრძვის ბიძინა ივანიშვილს, თუ ჯერ კიდევ უცხადებს ლოიალობას ბიძინა ივანიშვილს, თუ ვის ებრძვის, ვინ არის სხვა, ვინც იღებს გადაწყვეტილებებს და ვისაც აქვს პასუხისმგებლობა თუნდაც მის დატყვევებაზე, თუ არა ივანიშვილი, აბა ვინ? სხვები ვინ არიან? მე ვეღარ ვხედავ, არ ვიცი ზარქუა თუ არის დღეს მმართველი ამ ქვეყნის, თუ ვინ უნდა იყოს, ცოტა გაუგებარია ჩემთვის.
ამიტომ, მისი [ღარიბაშვილის] პოზიციაც არის გაუგებარი იმიტომ, რომ რაღაც უნდა, რაღაცას ცდილობს, მაგრამ ბოლომდე ვერ ბედავს და ბოლომდე გარკვეული პოზიცია ნამდვილად არ გააჩნია," - განაცხადა სალომე ზურაბიშვილმა.
ზურაბიშვილმა არსებულ ვითარებას წარმოუდგენელი ცირკი უწოდა. მისი თქმით, რეჟიმის წარმომდგენლები თავად ამბობენ, რომ მათ შორის არიან კორუმპირებული ადამიანები
"ერთმანეთს აბრალებენ , რომ არიან მოღალატეები არიან, თვითონ გამოდიან და ერთმანეთს აბეზღებენ, როგორც ვნახეთ ყოფილი თავდაცვის მინისტრი აბეზღებს ყოფილ პრემიერს. წარმოუდგენელი სცენარი და ცირკია. რაც აჩვენებს ყველაზე მეტად, რომ არის უნდობლობა და რომ ეს რეჟიმი მიდის ჩქარი ტემპით თავის დასასრულისკენ. ვერავინ იტყვის როდის, ეს არაერთხელ მითქვამს, გავიმეორებ,მაგრამ ეს არის დაშლის ნიშნები, რომ უკვე არაფერი იჭერს რეჟიმს თუ არა გარე ფაქტორი, რომ რუსეთი უმაგრებს ზურგს, შემოდის თავის ტექნოლოგებით და ფულით. ერთგვარად ერთიმეორეს მხარდაჭერაა. საქართველო მხარს უჭერს სანქციების გვერდის ავლით და ამით საქართველოც სარგებლობს, რადგან აქ არის ერთ ერთი მისი შემოსავალი იმ დროს, როდესაც ეკონომიკა პრაქტიკულად გაჩერებულია”, - აცხადებს ზურაბიშვილი.
