აშშ-ის დემოკრატმა სენატორმა რიჩარდ ბლუმენთალმა, რომელიც რუსეთის წინააღმდეგ სანქციების შესახებ კანონპროექტის თანაავტორია, განაცხადა, რომ იმედოვნებს, კანონპროექტს საბოლოოდ 2026 წლის სექტემბერში მიიღებენ.
ბლუმენთალმა ამის შესახებ კიევში გამართულ პრესკონფერენციაზე განაცხადა.
ბლუმენთალის თქმით, კანონპროექტს რესპუბლიკელებს შორის ძლიერი მხარდაჭერა აქვს.
„მას რესპუბლიკელთა მხრიდან ძალიან ძლიერი მხარდაჭერა აქვს. იმედი მაქვს, რომ დემოკრატების მხრიდანაც ექნება, ისევე როგორც აშშ-ის სენატში ჰქონდა“, - თქვა მან.
ბლუმენთალის განცხადებით, კანონპროექტი „მკაცრ მეორეულ სანქციებს ითვალისწინებს, ასევე პირდაპირ სანქციებს ოლიგარქების, ფინანსური ინსტიტუტების, შესაბამისი ინდუსტრიების, სანქციების გვერდის ავლის ხელშემწყობებისა და ე.წ. ჩრდილოვანი ფლოტის წინააღმდეგ“.
მისი თქმით, საკვანძო ფაქტორებია სანქციების აღსრულება და აშშ-ის პრეზიდენტ დონალდ ტრამპის პოზიცია.
ბლუმენთალმა აღნიშნა, რომ კანონპროექტის მიღების გაჭიანურება თეთრი სახლისგან მწვანე შუქის მიღების აუცილებლობით იყო განპირობებული. მანამდე კანონპროექტზე ხანგრძლივი მოლაპარაკებები მიმდინარეობდა აშშ-ის სავაჭრო წარმომადგენელთან და ორივე პარტიის ხელმძღვანელობასთან.
მან ასევე იმედი გამოთქვა, რომ კანონპროექტს საბოლოოდ 2026 წლის სექტემბერში მიიღებენ.
„იმედი მაქვს, ეს სექტემბერში მოხდება. წარმომადგენელთა პალატა სექტემბერში ბრუნდება და მე ძალიან მჭიდრო კონტაქტი მაქვს პალატის ხელმძღვანელობასთან. ძალიან იმედი მაქვს, რომ ისინი მაშინ მისი მიღების გადაწყვეტილებას მიიღებენ“, - განაცხადა სენატორმა.
ამასთან, მისი თქმით, აშშ-ის პრეზიდენტის სპეციალურმა წარმომადგენლებმა, სტივ უიტკოფმა და ჯარედ კუშნერმა, კრემლის ლიდერ ვლადიმირ პუტინს „უფრო სერიოზულად უნდა შეხედონ“.
ამის შესახებ მან კიევში ჟურნალისტებთან საუბრისას განაცხადა.
ბლუმენთალის შეფასებით, ტრამპის შუამავლები უკრაინის საკითხზე ამ ეტაპზე „საკმაოდ არაეფექტიანები აღმოჩნდნენ“.
„ვფიქრობ, მათ პუტინს უფრო სერიოზულად უნდა შეხედონ და უკრაინის მიმართ ურყევი და თანმიმდევრული მხარდაჭერა აჩვენონ“, - განაცხადა სენატორმა.
მისი თქმით, უიტკოფი და კუშნერი „ძალიან ხშირად ქმნიდნენ შთაბეჭდილებას, თითქოს აშშ მზად იყო ისეთ დათმობებზე წასასვლელად, რომლებიც უკრაინისთვის არახელსაყრელი იქნებოდა“.
„აგრესორის მიმართ სისუსტის გამოვლენა ბოლო რამაა, რაც უნდა გაკეთდეს. როგორც უკვე ვნახეთ, ის უბრალოდ კიდევ უფრო ძლიერ ზეწოლას მოახდენს“, - დასძინა ამერიკელმა სენატორმა.
