საქართველოს პრეზიდენტის სამუშაო ვიზიტი ბრატისლავაში დასრულდა.
გიორგი მარგველაშვილი სლოვაკეთის დედაქალაქში ყოველწლიურ გლობალური უსაფრთხოების ფორუმში მონაწილეობდა. სახელმწიფოს მეთაურმა ვიზიტის ფარგლებში ევროპის ქვეყნების ლიდერებთან ორმხრივი შეხვედრები გამართა და ქართულ-სლოვაკურ ბიზნეს-ფორუმში მონაწილეობა მიიღო.
პრეზიდენტის ადმინისტრაციის ცნობით, ვიზიტის დასასრულს საქართველოს პრეზიდენტმა ქართულ მედიასთან GLOBSEC-ის ფორუმში ქართული მხარის მონაწილეობის მნიშვნელობა შეაფასა.
„პირველ რიგში მსურს ხაზი გავუსვა იმ განწყობას, რომელიც საქართველოს მიმართ ჩვენს მეგობარ ქვეყნებშია. ყველამ გულთან ახლოს მიიტანა თბილისში დატრიალებული სტიქიური უბედურება და მხადაჭერა და დახმარება აღგვითქვა. ასეთი ფორუმი საქართველოს უსაფრთხოების სიღრმისეული განხილვის საუკეთესო შესაძლებლობაა. ჩვენ შევძელით, რომ საქართველოს თემატიკა ყოფილიყო აქტუალური და ჩვენი ქვეყნის უსაფრთხოების გარანტიებზე შინაარსობრივად და საფუძვლიანად ესაუბრათ მსოფლიო ლიდერებს. გარდა ამისა ჩვენ გვქონდა შესაძლებლობა, ნატო-ს დამფუძნებელი ქვეყნების ლიდერებთან, როგორიცაა გაერთიანებული სამეფოს პრემიერ-მინისტრი, ასევე შეერთებული შტატების სენატორთა დელეგაცია, განგვეხილა საქართველოს უსაფრთხოება და ამ საკითხზე გააქტიურებული დიალოგის აუცილებლობა.ჩვენ ასევე აქტიურად ვიმუშავეთ და ვიმსჯელეთ, ნატო-ს შედარებით ახალი წევრი ქვეყნების ლიდერებთან. ხაზი უნდა გავუსვათ იმ ფაქტს, რომ აღმოსავლეთ ევროპის ქვეყნები განსაკუთრებით კარგად იაზრებენ საქართველოს როლს ევროპული და ევროატლანტიკური უსაფრთხოების კონტექსტში და გარდა იმისა, რომ არიან ჩვენი ტრადიციული მხარდამჭერები, ვმუშაობთ იმაზეც, რომ ამის პარალელურად ისინი გახდნენ საქართველოს ძალიან აქტიური ადვოკატები როგორც ნატო-ს, ისევე ევროკავშირის ფორმატებში.აგრეთვე გვქონდა შესაძლებლობა ფორუმის ფარგლებში გვქონოდა სამუშაო შეხვედრა სლოვაკეთის პრეზიდენტთან. ეს იყო ვიზიტი, რომელიც ახალ იმპულსს მისცემს ჩვენს თანამშრომლობას. მე ბატონი პრეზიდენტი საქართველოში მოვიწვიე. ასევე, დარწმუნებული ვარ, რომ ის ბიზნესფორუმი, რომელიც ამ პროცესების პარალელურად გაიმართა, ახალ ხელს შეუწყობს ბიზნესთანამშრომლობისა და ურთიერთობის გააღრმავებას ისეთ ქვეყნებთან, როგორებიც არიან სლოვაკეთი, ხორვატია, მონტენეგრო. ამ ქვეყნებთან გვაქვს თანამშრომლობის ძალიან საინტერესო პოტენციალი, რომლის ათვისებაც ჩვენს მიზანს წარმოადგენს“, - განაცხადა საქართველოს პრეზიდენტმა.
ქვეყნის პირველი პირი ქართულ დელეგაციასთან ერთად საქართველოში დღეს დაბრუნდება.
