ამერიკულ ჟურნალ „ფორინ აფერსში" გამოქვეყნებულია სტატია სათაურით „უკრაინის უბოროტესი მტერი", რომელშიც გაანალიზებულია უკრაინის გამოწვევები და რისკები, მათ შორის კორუფცია - ყველაზე მთავარი პრობლემა. ამ კონტექსტით პუბლიკაციაში საუბარია საქართველოს გამოცდილებაზეც (ავტორი ტომ კიტინგი).
„უკრაინას იმედი უნდა ჰქონდეს. ბევრი უკრაინელი შესცქერის საქართველოს გამოცდილებას. 2005 წელს ამ ქვეყანას საერთაშორისო ორგანიზაციების მიერ შემუშავებულ რეიტინგში კორუფციასთან მიმართებით 130-ე ადგილი ეკავა 158-დან. ხელისუფლების მიერ გატარებული კარდინალური რეფორმების წყალობით, რომელმაც დანაშაულის მიმართ „ნულოვანი ტოლერანტობისა" და ძლიერი პოლიტიკური ნების გამოვლენა, აგრეთვე ახალი კადრების და ახალი ტექნოლოგიებით სარგებლობა მოითხოვა, მოხდა „მოჯადოებული წრის" გარღვევა. დღეს საქართველო 55-ე ადგილი უკავია და წინ გაუსწრო ევროკავშირის ისეთ ქვეყნებს, როგორიცაა იტალია, რუმინეთი და საბერძნეთი.
რასაკვირველია, უდავოა ის, რომ საქართველო იდეალური არ არის, მას აქვს პრობლემები დემოკრატიული მმართველობის თვალსაზრისით, მაღალჩინოსნების მოქმედება ჯერ კიდევ სუსტად კონტროლდება და რეგულირდება, თუმცა კორუფციასთან სერიოზულმა ბრძოლამ ქვეყანას სიკეთე მოუტანა. საქართველოს 2005 წელს 112-ე ადგილი ეკავა ბიზნესის იოლად წარმოების რეიტინგში (მსოფლიო ბანკის მონაცემებით), დღეს კი ამ საკითხში საქართველოს მე-8 ადგილი უჭირავს. ქვეყანაში უცხოური ინვესტიციების ნაკადია, მისი ეკონომიკა კი ბოლო 10 წლის განმავლობაში საშუალოდ 6%-ით მატულობს", - აღნიშნულია პუბლიკაციაში.