დღეს, 31 მაისს, 20:00 საათზე, თბილისის დიდ საკონცერტო დარბაზში პატრისია კაასი პროექტს „კაასი მღერის პიაფს" წარმოადგენს.
ფრანგი მომღერალი უკვე თბილისშია. პატრისია კაასმა პრესკონფერენცია გამართა და მედიის წარმომადგენლებს შეხვდა. როგორც პრესკონფერენციაზე პატრისია კაასმა განაცხადა, „ეს პროექტი ედიტ პიაფის გარდაცვალებიდან 50 წლის იუბილეს ეძღვნება. მე ბედნიერი ვარ რომ ქართველი მაყურებლის წინაშე წარვსდგები. ეს ძალიან სასიამოვნო საღამო იქნება და შევეცდები რომ ამ კონცერტში ჩემი მაქსიმუმი ჩავდო."
პატრისია კაასმა ამ პროექტისთვის ედიტ პიაფის საუკეთესო ჰიტები შეარჩია. ალბომში სულ 21 კომპოზიცია შევიდა, ყველა მათგანის არანჟირება კი ახალგაზრდა პოლონელ კომპოზიტორს, აბელ კოჟენოვსკის ეკუთვნის. კაასმა ამ პროექტით კონცერტები გამართა ნიუ იორკის კარნეგი ჰოლში, ლონდონის როიალ ალბერტ ჰოლში, პარიზის ოლიმპიაში, მოსკოვის ოპერის თეატრში და მსოფლიოს სხვა უდიდეს დარბაზებში.
აღსანიშნავია, რომ მსოფლიო ტურნეს ბოლო კონცერტს თბილისში წარმოადგენს. „დღეს თბილისში ეს არის ჩემი ტურნეს ბოლო საღამო და ორგანიზატორებისგან ყველა პირობა მაქვს, რომ საღამო გამორჩეული და საინტერესო იქნება"-განაცხადა პატრისია კაასმა.