დღეს აჭარის მთავრობის თავმჯდომარემ არჩილ ხაბაძემ, აჭარის ჯანდაცვის მინისტრმა ნუგზარ სურმანიძემ და განათლების, კულტურისა და სპორტის მინისტრმა გია თავამაიშვილმა მეორე მსოფლიო ომის ვეტერანი სერგო ტაბაღუა მოინახულეს და ფაშიზმზე გამარჯვების დღე მიულოცეს.
სერგო ტაბაღუა 89 წლისაა და მას მეორე მსოფლიო ომის თითქმის ყველა ბრძოლაში აქვს მონაწილეობა მიღებული. ამჟამად იგი ვეტერანთა გაერთიანება "ომგადახდილის" ბათუმის ორგანიზაციის თავმჯდომარეა. ბატონი სერგო პროფესორია და ათეულობით წლებია ლექციებს უკითხავს სტუდენტებს. დაწერილი აქვს რამდენიმე წიგნი მეორე მსოფლიო ომის შესახებ და დიდი წვლილი მიუძღვის აჭარაში საარქივო მასალების შექმნაში. ამჟამად მუშაობს წიგნზე, რომელიც მეორე მსოფლიო ომში დაკარგულ გმირებს ეხება.
სერგო ტაბაღუამ სტუმრებს თავისი ნაშრომები გააცნო და სტუმრობისთვის მადლობა გადაუხადა.
