მომავალ კვირაში პარლმანეტი მესამე მოსმენით განიხილავს "სახელმწიფო პენსიის შესახებ" კანონში შესატანი ცვლილებების პროექტს, რომლის მიხედვით საჯარო საქმიანობად არ ჩაითვლება საარჩევნო კომისიებში განხორციელებული შრომითი ანაზღაურებადი საქმიანობა.
იგივე სახით ცვლილებები აისახება "სახელმწიფო კომპენსაციისა და სახელმწიფო აკადემიური სტიპენდიის შესახებ" კანონში.
ცვლილებების პროექტის მესამე მოსმენით განხილვასთან დაკავშირებით გადაწყვეტილება პარლამენტის ბიუროს დღევანდელ სხდომაზე იქნა მიღებული.
ცვლილებებები გულისხმობს იმას, რომ საოლქო და საუბნო საარჩევნო კომისიის წევრებს, რომლებიც იღებენ პენსიას, კომპენსაციას ან სოციალურ პაკეტს, კომისიაში საქმიანობასთან დაკავშირებით მიღებული ანაზღაურების გამო, პენსია, კომპენსაცია თუ სოციალური დაფინანსება არ შეუწყდებათ.
ცვლილებები შევა "საარჩევნო კოდექსში", "სახელმწიფო კომპენსაციისა და სახელმწიფო აკადემიური სტიპენდიის შესახებ" კანონში და ასევე "სახელმწიფო პენსიის შესახებ" კანონში. პარლამენტში წარდგენილი ცვლილებებით, საოლქო საარჩევნო კომისიის დროებით წევრს და საუბნო საარჩევნო კომისიის წევრს, რომლებიც შეყვანილი არიან სოციალურად დაუცველი ოჯახების ერთიან ბაზაში, შესაბამისი ხელფასი არ ჩაეთვლებათ ოჯახის ერთობლივ შემოსავალში და არ შეუწყდებათ სახელმწიფო დაფინანსება.
იგივე ვრცელდება პირებზე, რომლებიც იღებენ სოციალურ პაკეტს მთავრობის დადგენილების შესაბამისად.
