საქართველოს იუსტიციის სამინისტროში სახელმწიფო ორგანიზაციების IT სამსახურებისა და ქვედანაყოფების ეფექტიანობის გაზრდაზე მომუშავე ჯგუფის შეხვედრა გაიმართა, რომელიც ელექტრონული მმართველობის განვითარების ხელშემწყობი სახელმწიფო კომისიის ფარგლებში ფუნქციონირებს. სახელმწიფო კომისიას პრემიერ-მინისტრი ხელმძღვანელობს, კომისიის თავმჯდომარის მოადგილე კი იუსტიციის მინისტრია.
შეხვედრას ესწრებოდნენ მთავრობის ადმინისტრაციისა და სხვადასხვა სამინისტროს წარმომადგენლები. ღონისძიების მონაწილეებმა ინფორმაციული უსაფრთხოების, საერთაშორისო სავაჭრო ქსელისა და IT სამსახურების განვითარების მიმართულებები განიხილეს.
სახელმწიფო ორგანიზაციების IT სამსახურებისა და ქვედანაყოფების ეფექტიანობის გაზრდაზე მომუშავე ჯგუფი ელექტრონული მმართველობის განვითარების ხელშემწყობი სახელმწიფო კომისიის დადგენილებით ფუნქციონირებს. კომისიის მიზანია საქართველოში საინფორმაციო-საკომუნიკაციო ტექნოლოგიებზე დაფუძნებული სისტემების მეშვეობით ელექტრონული მმართველობის განხორციელების საკითხების კოორდინირება და შესაბამისი გადაწყვეტილებების მიღება. მის შემადგენლობაში შედის ყველა სამინისტრო, რომლებიც წარმოდგენილია მინისტრის მოადგილეებისა და ინფორმაციული ტექნოლოგიების განვითარებაზე პასუხისმგებელი პირებისგან; ასევე, საქართველოს პარლამენტის ინფორმაციული ტექნოლოგიების დეპარტამენტის ხელმძღვანელობა. კომისიის ფარგლებში შექმნილია 9 სამუშაო ჯგუფი, რომლებიც გაწეული სამუშაოს შესახებ ანგარიშს კომისიის წევრებს გარკვეული პერიოდულობით წარუდგენენ.
