საპარლამენტო უმცირესობის წევრს ნუგზარ წიკლაურს გვიან ღამით საკუთარ სახლთან რამდენიმე უცნობი პირი დახვდა და გავრცელებული ინფორმაციის მიხედვით, მას ელექტროშოკით გაუსწორდნენ.
წიკლაურს მძიმე ტრავმა აქვს მიღებული თავის არეში. დაზიანებული აქვს სხეულის სხვა ნაწილებიც.
თავდამსხმელებმა დეპუტატის მანქანაში მოთავსება და გატაცებაც სცადეს, თუმცა მათ ამის საშუალება წიკლაურის საცხოვრებელი კორპუსიდან გამოსულმა მეზობლებმა არ მისცეს.
დეპუტატ კობა სუბელიანის ინფორმაციით, დეპუტატ ნუგზარ წიკლაურს ღამის სამ საათზე სახლთან დახვდა რვა ადამიანი, სცადეს მანქანაში ჩაგდება და გატაცება.
"სასტიკად არის ნაცემი, ქალა-ტვინის დახურული ტრავმა, ტვინის შერყევა, დაზიანებები სახეზე და ელექტროშოკის კვალი ფეხზე, დაზიანებული აქვს ასევე მუხლები. მეზობლების ჩარევის შედეგად თავდამსხმელები ადგილიდან მიიმალნენ.
პირველადი დახმარების მიზნით გადაიყვანეს ღუდუშაურში და ახლა გადაყავთ რესპუბლიკურში კომპიუტერულ ტომოგრაფიაზე", - აცხადებს სუბელიანი.
მომხდარზე კომენტარი თავად წიკლაურმაც გააკეთა.
"დაახლოებით ღამის სამი საათისთვის დავბრუნდი სახლში. სახლთან დამხვდა სამი მანქანა, რომელშიც იყო შვიდი ან რვა ადამიანი, ყოველგვარი სიტყვების გარეშე დამესხნენ თავს და დაახლოებით ორი წუთის განმავლობაში მიმდინარეობდა ეს ჩხუბი. მათი ამოცანა იყო მანქანაში შეგდება და როცა ეს არ მოხერხდა, ერთ-ერთმა დამადო ორჯერ ელექტროშოკი", - განაცხადა ნუგზარ წიკლაურმა.
დეპუტატი მომხდარს პოლიტიკურ ზეწოლას უკავშირებს.
