თბილისის საქალაქო სასამართლოში ,,თბილისის განვითარების ფონდთან" დაკავშირებით, დედაქალაქის უფლებამოსილებაშეჩერებული მერის გიგი უგულავს პროცესი მიმდინარეობს. პროცესს თავად ბრალდებული გიგი უგულავაც ესწრება.
გამოძიება გიგი უგულავას 2011-12 წლებში თბილისის განვითარების ფონდიდან მილიონობით ლარის გაფლანგვას ედავება. თავად ბრალდებული უგულავა მის დაკავებას არ გამორიცხავს. პროკურატურა კი გიგი უგულავას საზოგადოების შეცდომაში შეყვანისა და პროკურატურის დისკრედიტაციის მცდელობაში ადანაშაულებს. როგორც უწყების მიერ გავრცელებულ განცხადებაშია ნათქვამი, სწორედ ამ მიზნით მოხდა დაცვის მხარის მიერ „თბილისის განვითარების ფონდის" საქმეზე წინასასამართლო სხდომის წინა დღეს საუბრების შინაარსის დამახინჯებული, ნაწილობრივი გასაჯაროება.
განცხადებაში ნათქვამია: "კანონის მოთხოვნათა შესაბამისად, პროკურატურამ დაცვის მხარეს სრულად გადასცა სისხლის სამართლის საქმის მასალები, მათ შორის თბილისის საქალაქო სასამართლოს მოსამართლის 2013 წლის 24 დეკემბრის ბრძანების საფუძველზე გატარებული ოპერატიულ-სამძებრო ღონისძიების „სატელეფონო საუბრის ფარული მიყურადებისა და ჩაწერის" შედეგად მოპოვებული ბრალდებულ გიორგი უგულავას სატელეფონო საუბრების ჩანაწერები, რომლებიც მტკიცებულებითი მნიშვნელობისაა. მიღებული მასალები პროკურატურამ კანონით განსაზღვრული ვალდებულების შესრულებისას გადასცა მხოლოდ დაცვის მხარეს",- ნათქვამია პროკურატურის განცხადებაში.
გუშინ გიგი უგულავამ ის პირადი მიმოწერა გაასაჯაროვა, რომელიც მთავარმა პროკურატურამ "თბილისის განვითარების ფონდთან" დაკავშირებულ საქმეს მტკიცებულებებად დაურთო.
უგულავას თქმით, საქმეზე დართული ერთ-ერთი დოკუმენტი მისი შვილთან სატელეფონო საუბრის ჩანაწერია. მეორე კი უგულავას მიმოწერაა აწ გარდაცვლილ რეზო ადამიასთან
,, თბილისის განვითარების ფონდთან" დაკავშირებით, უგულავას 50-ათასლარიანი გირაო აქვს შეფარდებული და საქმის ფარგლებში მას მერის უფლებამოსილება შეუჩერდა.
უგულავას ბრალდება 2013 წლის 18 დეკემბერს წარედგინა. საქმის მასალების მიხედვით, მას ბრალი ედება საქართველოს სისხლის სამართლის კოდექსის 182-ე მუხლის მე-2 და მე-3 ნაწილებით - სამსახურებრივი მდგომარეობის გამოყენებით, ორგანიზებული ჯგუფის მიერ, დედაქალაქის განვითარების მიზნით შექმნილი ა(ა)იპ "თბილისის განვითარების ფონდისთვის" გამოყოფილი დიდი ოდენობით საბიუჯეტო სახსრების გაფლანგვის ფაქტზე.
გიგი უგულავასთვის წარდგენილი ბრალდება 7-დან 11 წლამდე ვადით თავისუფლების აღკვეთას ითვალისწინებს.
