ღვინის ექსპორტის ტემპის დაცემას, ქართული ღვინის ფალსიფიკაციის მაღალ დონეს უკავშირებს სომელიეთა ასოციაციის ხელმძღვანელი და ღვინის მწარმოებელი კომპანია "მარანი ხეცურიანის"Dდამფუძნებელი შალვა ხეცურიანი.
ხეცურიანი მიიჩნევს, რომ დიდი ფალსიფიკაცია განსაკუთრებით დსთ-ს ქვეყნებში ფიქსირდება.
"ექსპორტის დაცემის მეორე ფაქტორია შიდაწესების დაურეგლურებლობა. ექსპორტის მნიშვნელოვანი ხელისშემშლელი ფაქტორია ასევე არასწორი მარკეტინგული კამპანიის წარმოება სამიზნე ბაზრებზე. გასათვალისწინებელია ასევე მოგების მარჟის ფაქტორიც, რადგანაც ქართული ღვინო საკმაოდ ძვირია და მაღალი ფასის გამო ჩილესა და არგენტინის ღვინოებს კონკურენციას ვერ უწევს."- განაცხადა სააგენტო "ჯი-ეიჩ-ენთან" საუბრისას შალვა ხეცურიანმა.
ხეცურიანის აზრით მდგომარეობა თამაშის წესებისა და კანონმდებლობის
დარეგულირების შემდეგ გამოსწორდება.
"თუმცა რეალობაში არ არის ადამიანი და არც გაერთიანება, რომელიც ინიციატივას აიღებს და ამას ყველაფერს გააკეთებს. მნიშვნელოვანია ადგილწარმოშობების საზღვრები უნდა განისაზღვროს თუ რა ტიპის ღვინო უნდა იყოს ნაწრმოები ამა თუ იმ ადგილწარმოშობის ყურძნიდან. დადგინდეს ასევე თუ ვინ და რა ტექნოლოგიებით უნდა აწარმოოს ღვინო. არ შეიძლება ღვინოს ეწეროს მუკუზანი და ის საერთოდ არ იყოს ნაწარმოები მუკუზანისაგან და ალაზნის ველის სხვადასხვა ადგილზე მოწეული ყურძნისაგან იყოს ნაწარმოები", - აცხადებს სომელიეთა ასოციაციის ხელმღძვანელი.
შალვა ხეცურიანი აცხადებს, რომ ქვეყანამ ერთობლივი მარკეტინგული კამპანია უნდა აწარმოოს.
"ერთობლივი მარკეტინგის წარმოება სახელმწიფომ უნდა დაიწყოს. ბოლო 4 წლის განმავლობაში გამოვდივარ და ვამბობ, რომ სახელმწიფომ ინიციატივა თავის თავზე უნდა აიღოს. ამასვე იძახიან სხვა ღვინის მწარმოებლებიც, მაგრამ გამგონი არ არის", - განაცხადა ხეცურიანმა დადასძინა, რომ "სხვა ქვეყნებში ამას სახელმწიფო აკეთებს, რადგანაც ქვეყნის ერთიან მარკეტინგში წამყვანი როლი სახელმწიფოს ეკისრება. ღვინო არის ქვეყნის სიმდიდრე და მის კეთილდრეობაზე და პოპულარიზაციაზე სახელმწიფომაც უნდა იზრუნოს. თუმცა პოლურაზიაცია მარტო რეკლამებით არ შემოიფარგლება".
შეგახსენებთ, რომ 2009 წელს ღვინის ექსპორტი 2008 წელთან შედარებით 10 %-ით შემცირდა. 2008 წელს საზღვარგარეთ 12 მლნ. 192 ათას 475 ბოთლი ქართული ღვინის ექსპორტი განხორციელდა, მაშინ როდესაც 2009 წელს ექსპორტი 1 მლნ. 224 ათას 314 ბოთლით შემცირდა და გასულ წელს ექსპორტმა 10 მლნ. 968 ათას 161 ბოთლი შეადგინა.
მნიშვნელოვანი კლება დაფიქსირდა ასევე ქართული ღვინის მთავარ სამიზნე ბაზარზე. ოფიციალური მონაცემებით, 2009 წელს 2008 წელთად შედარებით ქართული ღვინის ექსპორტი უკრაინაში 32 %-ითაა შემცირებული. 2009 წელს უკრაინაში 4 მლნ. 573 ათას 461 ბოთლი ქართული ღვინო გავიდა, მაშინ როდესაც ეს მონაცემები 2008 წელს 6 მლნ. 747 ათას 668 ბოთლს აღწევდა.
სამაგიეროდ გასულ წელს 2008 წელთან შედარებით ღვინის ექსპორტი გაზრდილია ყაზახეთში, ბელორუსიაში, ლიტვაში, აზერბაიჯანში, ჩინეთსა და კიდევ რამდენიმე ქვეყანაში.
