ვიცე-სპიკერი თამარ ჩუგოშვილი იზიარებს პოზიციას რომ მოსამართლეთა სია არსებული ფორმით არ უნდა დამტკიცდეს და შესარჩევი კრიტერიუმების დადგენა, აუცილებელია. წინააღმდეგ შემთხვევაში, მის მხარდაჭერას არ აპირებს.
„ჩვენი ქვეყნისთვის მნიშვნელოვანია სწორი და კარგი სასამართლო სისტემა. კარგი სასამართლო სისტემა არ აპირებს რეპუტაციის გარეშე. სასამართლოს რეპუტაციას დისკრედიტირებული ადამიანები ვერ შექმნიან“, - ამბობს ჩუგოშვილი
შეგახსენებთ, რომ იუსტიციის უმაღლესმა საბჭომ უზენაეს სასამართლოში წარსადგენი მოსამართლეთა 10 კანდიდატურა დაასახელა: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე. 10-კაციანი სია იუსტიციის საბჭომ დასამტკიცებლად პარლამენტს გადაუგზავნა.
მოსამართლეთა სიამ პარლამენტში დაპირისპირება გამოიწვია. ეკა ბესელიამ პარლამენტის იურიდიული კომიტეტის თავმჯდომარის თანამდებობა 2018 წლის 27 დეკემბერს დატოვა. თანამდებობა დატოვა მისმა პირველმა მოადგილმე ვანო ზარდიაშვილმაც. 2018 წლის 31 დეკემბერს, იურიდიული კომიტეტის თავმჯდომარის პირველ მოადგილედ გედევან ფოფხაძე აირჩიეს.
ეკა ბესელიამ განაცხადა, რომ თანამდებობის დატოვებით უზენაესი სასამართლოს მოსამართლეების უვადოდ დანიშვნის პროცესი შეაჩერა. ბესელიას განცხადებას პარლამენტის თავმჯდომარემ, ირაკლი კობახიძემ, გაუგებარი უწოდა. ირაკლი კობახიძემ ეკა ბესელიას გუნდურობაზე მიუთითა და აღნიშნა, რომ ეკა ბესელია იმ კავშირზე საუბრობდა, რომელიც არ არსებობს და ეს არ არის გუნდური თამაში. მისივე თქმით, გუნდის ნაწილი იქნება ის, ვინც გუნდის თამაშს თამაშობს. ეკა ბესელიამ განაცხადა, რომ ის გუნდიდან წასვლას არ აპირებს და ბრძოლას გააგრძელებს. 2019 წლის 3 იანვარს, „ქართული ოცნების“ ოფისში ფრაქცია „ქართული ოცნების“ სხდომა გაიმართა, რომელსაც პარტიის თავმჯდომარე ბიძინა ივანიშვილი ესწრებოდა. სხდომაზე გედევან ფოფხაძის იურიდიული კომიტეტიდან გაწვევის გადაწყვეტილება მიიღეს.
