"საარჩევნო ბიულეტენების უბნებისთვის დაგვიანებით მიწოდება სტამბის მწყობრიდან გამოსვლამ გამოიწვია, თუმცა ამას არჩვენების დროულად დაწყებისთვის ხელი არ შეუშლია", - ამის შესახებ ჟურნალისტებს ცენტრალური საარჩევნო კომისიის პრესსპიკერმა ჯული გიორგაძემ "ეროვნული საბჭოს" მიერ შეტანილ საჩივარის კომენტირებისას განუცხადა.
"ცესკო ყველა საჩივარზე დაუყოვნებლივ რეაგირებას მოახდენს. რაც შეეხება აღნიშნულ საჩივარს, დილით უკვე განვმარტეთ, რომ რამდენიმე უბანზე ბიულეტინების შეტანა სტამბის მწყობრიდან გამოსვლის გამო დაგვიანდა, თუმცა ამის გამო კენჭისყრის პროცედურა არ შეფერხებულა", - აღნიშნა ცესკოს პრესსპიკერმა.
რამდენიმე წუთის წინ ცესკოში პირველი საჩივარი "ეროვნული საბჭოს სახელით" შევიდა.
შეგახსენებთ, რომ საქართველოში მიმდინარე თვითმმართველობის არჩევნებზე კენჭისყრა მთელი ქვეყნის მასშტაბით 08:00 საათზე დაიწყო. კენჭისყრა ტარდება 3694 საარჩევნო უბანზე, რომელიც საქართველოს მასშტაბით 73 ოლქის ტერიტორიაზეა განლაგებული.
ამომრჩევლები მონაწილეობას მიიღებენ ადგილობრივი თვითმმართველობის წარმომადგენლობითი ორგანოების - საკრებულოების, ასევე ქალაქ თბილისის მერის არჩევნებში. ადგილობრივი თვითმმართველობის არჩევნებთან ერთად საქართველოს 3 საარჩევნო ოლქში (№7 ჩუღურეთის, №12 გურჯაანისა და №60 ოზურგეთის) აირჩევენ საქართველოს პარლამენტის მაჟორიტარ კანდიდატებს.
თბილისის მერის არჩევნებში 9 კანდიდატი მონაწილეობს, თითოეულ საოლქო საარჩევნო კომისიაში კი - პოლიტიკური პარტიები და მათი მაჟორიტარი კანდიდატები. არჩევნებში მონაწილეობს 3 საარჩევნო ბლოკი და 14 პოლიტიკური სუბიექტი. კენჭისყრა გაგრძელდება 20:00 საათამდე. 24-საათიან რეჟიმში მუშაობს ცესკოს ცხელი ხაზი 51-00-51.
