ბუკოვსკი საქართველოში წუხელ ჩამოვიდა და აქ კვირის ბოლომდე დარჩება. ის საბჭოთა კავშირსა და თანამედროვე რუსეთის პოლიტიკაზე ახალ ეკონომიკურ სკოლაში, ილია ჭავჭავაძის უნივერსიტეტსა და თავისუფალ უნივერსიტეტში ლექციებს წაიკითხავს.

გარდა ამისა, დაგეგმილია შეხვედრები აღმასრულებელი და საკანონმდებლო ხელისუფლების წარმომადგენლებთანაც. ბუკოვსკი ოკუპაციის მუზეუმსაც მოინახულებს.

აღსანიშნავია, რომ თბილისში ჩამოსვლისას მან რუსეთ-საქართველოს ურთიერთობებზე გააკეთა კომენტარი და მოსკოვი 2008 წელს, საქართველოს წინააღმდეგ სამხედრო პროვოკაციის განხორციელებაში დაადანაშაულა.

"ის, რომ რუსეთი სამხედრო აგრესიისთვის ემზადებოდა, მთელმა მსოფლიომ იცოდა. ამაზე რუსეთი დასავლეთს ჯერ კიდევ კოსოვოს დამოუკიდებლობის აღიარების დროს აფრთხილებდა, თუმცა დასავლეთმა სათანადოდ ვერ შეაფასა მოსკოვის აგრესია და უნდა აღინიშნოს, რომ მათი მხრიდან რეაგირება დღემდე არასათანადოა", - განაცხადა ვლადიმერ ბუკოვსკიმ.

ამასთან, იმ კონტექსტში, რომ რუსეთი კვლავ არ ასრულებს ნაკისრ ვალდებულებს, დასავლეთი კი "ამას რეაგირების გარე ტოვებს", რუსი პუბლიცისტი ეჭვობს, რომ "დასავლეთისთვის მნიშვნელოვანია რუსული გაზი, ნავთი და მოსკოვთან კარგი ურთიერთობა".

გარდა ამისა, ბუკოვსკის ვარაუდით, "პროვოკაციები რუსეთის მხრიდან გაიზრდება, რადგან მას სჭირდება მუდმივი დაძაბულობა საქართველოსთან, რომ დასავლეთსა დ აშშ-ს თავისი ძალა დაანახოს".

"ეს კრემლის გეოპოლიტიკური თამაშია", - აცხადებს ის.

რაც შეეხება რუსეთის მიერ საფრანგეთისგან სამხედრო ხომალდ "მისტრალის" შეძენას, ბუკოვსკი მიიჩნევს, რომ "ავიამზიდი - ეს რუსეთის ხელში ნამდვილი საფრთხეა".