მოძრაობა "სამართლიანი საქართველოსთვის" ლიდერის ზურაბ ნოღაიდელის განცხადებით, თბილისის მერობის ერთიანი კანდიდატის გამოსავლენად მიმდინარე ოპოზიციის კონსულტაციებში ის ერთ-ერთი მთავარი მონაწილე იქნება.
ამის შესახებ ნოღაიდელმა ჟურნალისტებს ბრიუსელიდან დაბრუნების შემდეგ განუცხადა, სადაც ის სამუშაო ვიზიტით იმყოფებოდა.
"ოპოზიციამ არჩევნებზე ერთიანი კანდიდატები უნდა წარადგინოს. არის სხვადასხვა მოსაზრება, თუ რა მეთოდით უნდა მოხდეს კანდიდატების გამოვლენა, თუმცა ამაზე შევთანხმდებით. მთავარია, რომ ერთიანი კანდიდატით ვიბრძოლოთ სააკაშვილის წინააღმდეგ და დავამარცხოთ ეს რეჟიმი. ჩვენ ამ პროცესში ვიქნებით ერთ-ერთი ყველაზე მთავარი მონაწილე", - განაცხადა ნოღაიდელმა.
შეგახსენებთ, რომ თბილისის მერობის ერთიანი ოპოზიციონერი კანდიდატის გამოსავლენად პოლიტიკური უმცირესობის ერთმა ნაწილმა გუშინ კონსულტაციები დაიწყო.
