ბრიტანეთის პოლიციამ დააკავა ადამიანებით ვაჭრობაში ეჭვმიტანილი 6 ადამიანი, რომელთაგან 4 სავარაუდოდ რუსეთის მოქალაქეა. ამის შესახებ ბი-ბი-სის სკოტლენდ-იარდის პრეს-მდივანმა რიჩარდ ჯონსმა განუცხადა.
ეჭვმიტანილებთან ერთად დააკავეს რუსი, ლატვიელი და ბულგარელი 9 ქალი , რომლებიც, სავარაუდოდ, ბრიტანეთში ჩამოიყვანეს, როგორც სექსუალური მონები. ცხრავე ქალი სპეციალურ ცენტრშია გადაყვანილი, სადაც მათ ფსიქოლოგიურ დახმარებას აღმოუჩენენ.
რეიდი ქალაქ ჩელსის მრავალბინიან სახლში განხორციელდა. სამართალდამცავებმა ადგილიდან ამოიღეს 60 ათასი ფუნტი სტერლინგის ოდენობის ნაღდი ფული. სკოტლენდ-იარდის ადამიანით ვაჭრობისა და პროსტიტუციის წინააღმდეგ ბრძოლის სამმართველოს დეტექტივები დაკვირვებას სამი თვის განმავლობაში აწარმოებდნენ.
სამართალდამცავების განცხადებით, დაჯგუფება აკონტროლებდა რთულად ორგანიზებულ ბორდელთა ქსელს. მათ დაქირავებული ჰყავდათ დაცვა და ბუღალტერი და სარგებლობდნენ საკუთარი ვებ-გვერდით, სადაც სარეკლამო განცხადებებს ავრცელებდნენ.