გიორხელიძე მიიჩნევს, რომ სებ-ის პრეზიდენტმა, როდესაც ის ეკონომიკური ზრდის ტემპის შენელებაზე ალაპარაკდა, სიმართლე თქვა. თუმცა როგორც დემურ გიორხელიძე განმარტავს, ჯობდა გიორგი ქადაგიძეს გარკვეული მონაცემები გაეხმოვანებია და არა პრობლემებზე ესაუბრა.

„ვფიქრობ, რომ სებ-ის პრეზიდენტმა, გიორგი ქადაგიძემ გააკეთა იმ მონაცემების წარდგენა, რომელიც მას უწყებრივად დამუშავებული აქვს. შეიძლება ზედმეტი აქცენტირება იყო პრობლემებზე და ჯობდა მხოლოდ მონაცემების გახმოვანება, მაგრამ ეს არ ცვლის არსს იმისას, რომ ქართულ ეკონომიკაში ზრდის ტემპი არის დაბალი. შეფასების საქმეა, თუ როგორ ჩათვლი ქადაგიძის გამონათქვამებს. თუმც მას ტყუილი არაფერი უთქვამს"- აღნიშნა "ჯი-ეიჩ-ენთან" საუბარში ექსპერტმა.

მისივე განმარტებით, ის განცხადება, რაც სებ-ის პრეზიდენტის მიერ გაკეთდა იყო სწორი. გიორხელიძე განმარტავს, რომ „თქმა იმისა, რომ ეკონომიკაში ზრდის ტემპი ძალიან დაბალია, სირცხვილი არ არის".

„ეკონომიკაში ზრდის ტემპი ძალიან დაბალია და თქმა ამისა სულაც არ არის სირცხვილი. ვიდრე სსფ გააკეთებდა თავის შეფასებებს და „საქსტატი" დადებდა საბოლოო მონაცემებს, მე 3 თვით ადრე ვსაუბრობდი იმაზე, რომ ეკონომიკაში აქტიობა ძალიან დაბალია და საეჭვო იყო, რომ წლის ბოლოს 6 %-იანი ზრდა გვქონოდა.. მთავრობა ნაკლებად რეაგირებს იმ საღ ინფორმაციაზე, რომელსაც ჩვენ ვაძლევთ. თვეები გადის და აღმოჩნდება, რომ ჩვენი შეფასებები მართალი იყო. პირადად მე თუ გავაკეთე კრიტიკული შეფასება, ვინმემ უნდა მითხრას, რომ ეს არ იყო სწორი"- აცხადებს ექსპერტი.
შეგახსენებთ, რომ რამდენიმე დღის წინ სებ-ის პრეზიდენტმა გააკეთა განცხადება და აღნიშნა, რომ სებ-მა და სსფ-მა შესაძლოა საქართველოს ეკონომიკური ზრდის პროგნოზს გადახედოს.
„საქსტატმა" გამოაქვეყნა 2013 წლის პირველი კვარტლის მონაცემები. ჩვენ ასევე გვაქვს აპრილის წინასწარი მონაცემებიც. სამწუხაროდ ამ მონაცემების ერთობლიობა არ გვაძლევს იმის საშუალებას, რომ ვივარაუდოთ, რომ ჩვენ წლის ბოლოს 6 %-იან ეკონომიკური ზრდის მაჩვენებელზე გავალთ", - განაცხადა ქადაგიძემ.