EBRD-ის ინფორმაციით, საქართველოს ეკონომიკა აღდგა ორმაგი შოკისგან, რაც რუსეთთან 2008 წელს შეიარაღებული კონფლიქტით და გლობალური ეკონომიკური კრიზისით იყო გამოწვეული.
"წარმოება 2010 წელს სავარაუდოდ გაიზარდა 6.4 პროცენტით, ხოლო 2011 წლის პირველ ნახევარში დამატებით 5 პროცენტიანი ზრდა დაფიქსირდა, კერძო სექტორში საკრედიტო და საექსპორტო პოზიციების აღდგენის პირობებში. ამას ხელი შეუწყო წარმოების მასშტაბების ზრდამ და სხვა სექტორების გამოცოცხლებამაც. სოფლის მეორნეობაში გასული წლის გვალვის შემდეგ მდგომარეობა გამოსწორდა, მაგრამ ჯერ კიდევ დეპრესირებულია. პირდაპირი უცხოური ინვესტიციების შემოდინება ეკონომიკური ზრდის მნიშვნელოვანი კატალიზატორი იყო კრიზისამდელ პერიოდში. მისი მოცულობა კვლავ დაბალ დონეზე რჩება და ამ მხრივ ჯერ არ აღდგენილა კრიზისამდელი მაღალი მაჩვენებლები. საერთაშორისო ფინანსური ინსტიტუტების მხარდაჭერის დიდი პაკეტი მცირდება, თუმცა უცხოური რეზერვების დონე გონივრულ ჩარჩოებშია და ოთხი თვის იმპორტის მოცულობების დონეს ინარჩუნებს. პრობლემური სესხების წილი ფინანსურ სექტორში სტაბილურად კლებულობს, თუმცა მაინც მაღალია და 2011 წლის ივლისში დაფიქსირებული მთლიანი სესხების 9.9 პროცენტს შეადგენს"- განმარტავენ ევრობანკში.
EBRD-ის ინფორმაციითვე, საჯარო სექტორის კონსოლიდაცია გრძელდებოდა, თუმცა ინფლაციამ იმატა. ხელისუფლებამ შეძლო 2010 წელს მნიშვნელოვნად შეემცირებინა ფისკალური დეფიციტი . ეს მეტწილად განპირობებული იყო ხარჯების შემცირებით და ზოგიერთი ისეთი ფისკალური წესის დანერგვით, რომელიც საშუალოვადიან პერიოდში ქვეყანას დაეხმარება ფისკალური მდგრადობის ხელშეწყობაში. 2011 წლის აპრილში ფინანსთა სამინისტრომ 50 მილიონი ევროს ღირებულების ევრო-ობლიგაციები გამოუშვა ძალიან სახარბიელო პირობებით. ამან შეამცირა საშუალოვადიანი ფინანსური რისკები. ინფლაციის წნეხმა 2010 წლის შუა პერიოდში კვლავ იჩინა თავი შემდგომი გაუფასურებისა და სურსათზე ფასების გლობალური ზრდის გამო. თუმცა, ძირითადი ინფლაცია მაინც დაბალ ნიშნულზე დარჩა. მთავრობა ნაწილობრივ ახდენდა სოციალურად დაუცველი ოჯახებისადმი სურსათისა და ელ. ენერგიის გაზრდილი ხარჯების კომპენსაციას. ინფლაციამ იკლო წლიდან წლამდე მაისში არსებული 14.3 პროცენტიდან 7.2 პროცენტამდე 2011 წლის აგვისტოში. ეს მეტწილად განპირობებული იყო სურსათზე ფასების კლებით და მოთხოვნაზე შემცირებული წნეხით. ქვეყნის ცენტრალურმა ბანკმა შეძლო ფულად-საკრედიტო პოლიტიკის შემსუბუქება რეფინანსირების განაკვეთის 7.5 პროცენტამდე დაწევით.
