დიუშენის სინდრომის მქონე ბავშვები და მათი მშობლები, რომლებიც მედიკამენტის მოთხოვნით მთავრობის ადმინისტრაციასთან უკვე ოცდამეშვიდე ღამეს ათენებენ, ოჯახის სიწმინდის დღესთან დაკავშირებული მსვლელობის მონაწილეებს თავისუფლების მოედანზე დახვდნენ.
პაციენტების მშობლებს ადგილზე გაშლილი ჰქონდათ დიდი ბანერი წარწერით: “ოჯახი ჩვენი ფუძეა, ბავშვები - ჩვენი მომავალი. ერთად გადავარჩინოთ მათი სიცოცხლე!”
„გთხოვთ, რომ დაგვეხმაროთ ჩვენი ბავშვების გადარჩენაში“, - მიმართა დიუშენით დაავადებული ბავშვის მშობელმა, კახა წიქარიშვილმა სასულიერო პირებს, რომლებიც მსვლელობას მოუძღვებოდნენ წინ.
როგორც მან ჟურნალისტებს განაცხადა, ოჯახის ყლორტი, რომელზედაც მთელმა ოჯახმა უნდა იზრუნოს
"ოჯახი არის საქართველოს და ჩვენი სახელმწიფოს საფუძველი და ჩვენი საყრდენი და ბავშვი არის ოჯახის ყლორტი, რომელზედაც მთელმა ოჯახმა უნდა იზრუნოს. ამიტომ ჩვენ გვინდა, რომ ჩვენი ბავშვები დაგვილოცონ და ჩვენი ბავშვების გვერდით დადგეს", - ამბობს კახა წიქარიშვილი.
სასულიერო პირებმა ისინი დალოცეს და მსვლელობა გააგრძელეს, დიუშენით დაავადებული ბავშვები და მათი მშობლები კი თავისუფლების მოედანზე დარჩნენ.
ფოტო: "ტვ პირველი"
