კატარის მომლაპარაკებელთა დელეგაცია, რომელიც შეერთებულ შტატებთან შეთანხმებით მოქმედებს, თეირანში ჩავიდა, რათა ხელი შეუწყოს ირანთან ომის დასრულების შესახებ შეთანხმების მიღწევას და გადაუჭრელი საკითხების მოგვარებას. იუწყება Reuters.

Reuters-ის წყაროს ინფორმაციით, დელეგაცია პარასკევს ჩავიდა და მისი მიზანია „საბოლოო შეთანხმების მიღწევა, რომელიც ომს დაასრულებს და ირანთან ყველა სადავო საკითხს მოაგვარებს“.

კატარი, რომელიც წარსულში შუამავლის როლს ასრულებდა ღაზის სექტორში და სხვა კონფლიქტებში, ამჯერად პროცესში ნაკლებად იყო ჩართული მას შემდეგ, რაც ბოლო ესკალაციის დროს ირანული რაკეტებისა და დრონების შეტევების ქვეშ მოექცა.

ამასთან, გამოცემა აღნიშნავს, რომ მიუხედავად იმისა, რომ კონფლიქტის საწყის ეტაპზე შუამავლის ფუნქცია პაკისტანმა შეასრულა, კატარის დაბრუნება პროცესში ასახავს მის, როგორც აშშ-ის მნიშვნელოვანი პარტნიორისა და ვაშინგტონსა და თეირანს შორის არაოფიციალური საკომუნიკაციო არხის როლს.

ომი, რომელიც 28 თებერვალს დაიწყო აშშ-ისა და ისრაელის დარტყმებით ირანზე, კვლავ მყიფე ცეცხლის შეწყვეტის რეჟიმში მიმდინარეობს, თუმცა მხარეებს შორის მნიშვნელოვანი პროგრესი არ დაფიქსირებულა.

ხუთშაბათს ირანელმა მაღალჩინოსანმა Reuters-ს განუცხადა, რომ შეთანხმება არ არის მიღწეული, თუმცა მხარეებმა შეძლეს უთანხმოებების შემცირება. მისი თქმით, გადაუჭრელ საკითხებს შორის რჩება ირანის მიერ ურანის გამდიდრება და სრუტის კონტროლი.

აშშ-ის სახელმწიფო მდივანმა მარკო რუბიომ ხუთშაბათს აღნიშნა გარკვეული პროგრესი და განაცხადა: „არის გარკვეული პოზიტიური ნიშნები. არ მინდა ზედმეტად ოპტიმისტი ვიყო… ამიტომ ვნახოთ, რა მოხდება მომდევნო რამდენიმე დღეში“.

პარასკევს, კატარის დელეგაციის ირანში ყოფნასთან დაკავშირებით დასმულ კითხვაზე პასუხად, რუბიომ შვედეთში, NATO-ს საგარეო საქმეთა მინისტრების შეხვედრის ფარგლებში ჟურნალისტებს განუცხადა, რომ ირანთან მოლაპარაკებებში მთავარი შუამავალი პაკისტანია და მათ „შესანიშნავი სამუშაო შეასრულეს“.

„ცხადია, სხვა ქვეყნებსაც აქვთ საკუთარი ინტერესები, განსაკუთრებით სპარსეთის ყურის ქვეყნებს, რომლებიც ამ მოვლენების ცენტრში არიან. მათ საკუთარი სიტუაცია აქვთ. ჩვენ ყველასთან ვსაუბრობთ. უბრალოდ ვიტყოდი, რომ მთავარი ქვეყანა, რომელთანაც ამ ყველაფერზე ვმუშაობთ, არის პაკისტანი,“ - განაცხადა რუბიომ.