თბილისის ანძას აუქციონზე ხვალ, 1-ელ აგვისტოს გაიტანენ. შპს "ალფაკომის" სახელმწიფო საკუთრებაში არსებულ 100-პროცენტიანი წილის მართვის უფლებით გადაცემის მიზნით ელექტრონული აუქციონი გაიმართება.
ეკონომიკისა და მდგრადი განვითარების სამინისტროს ინფორმაციით, მისი საწყისი გასაყიდი ფასია 100 000 ლარი. ობიექტის დებიტორული დავალიანება 6 988 202, ხოლო კრედიტორული დავალიანება 2 917 158 ლარია. მისი 100-პროცენტიანი წილი 4 წლით მართვის უფლებით გაიცემა.
შპს "ალფაკომი" საქართველოს ტელერადიოცენტრს რამდენიმე თვის წინათ ეწოდა. მის შემადგენლობაში 35 სატელევიზიო და 34 რაიოდარხი შედის. მის შემადგენლობაში არსებული ერთ-ერთი მნიშვნელოვანი ობიექტი თბილისის ანძაა. ობიექტის საპრივატიზაციოდ გატანას ოპოზიციის, არასამთავრობო ორგანიზაციებისა და ჟურნალისტების ნაწილი ეწინააღმდეგება. მათი მოსაზრებით, ხელისუფლებას ობიექტის გასხვისება მედიის საქმიანობის შეზღუდვისა და მასზე ზეწოლისათვის სჭირდება. ისინი პრივატიზების შეჩერებასა და მისი პირობების გასაჯაროებას ითხოვენ.
მედია ადვოკატირების კოალიციის ორგანიზებით ეკონომიკის სამინისტროსთან ხვალ მორიგი საპროტესტო აქცია გაიმართება.