საზოგადოებრივი მაუწყებლის ხელმძღვანელობასა და "სახალხო კრების" თავმჯდომარეს ნონა გაფრინდაშვილს შორის მოლაპარაკება არ შედგა.
ნონა გაფრინდაშვილის თქმით, იგი რამდენიმე წუთის წინ საზოგადოებრივი მაუწყებლის ხელმძღვანელს გია ჭანტურიას ესაუბრა, თუმცა დიალოგი არ შედგა.
გაფრინდაშვილი აცხადებს, რომ გია ჭანტურიამ სატელეფონო საუბრის დროს სცადა მისთვის დაემტკიცებინა, რომ ქვეყანაში თავისუფალი მედიაა.
"ჩვენ და ბატონ გიას განსხვავებული წარმოდგენები გვაქვს დემოკრატიასა და თავისუფლებაზე. მინდა ვუთხრა ყველას ვინც ამ რეჟიმს ემსახურება - ყველაფერს ნათელი მოეფინება და ყველაფერს თავისი სახელი დაერქმევა", _ განაცხადა ნონა გაფრინდაშვილმა და აღნიშნა, რომ გია ჭანტურიას იმიტომაც არ სურს მათი შენობაში შეშვება, რომ საზოგადოებრივი მაუწყებლის შენობა სპეცდანიშნულების რაზმების წარმომადგენლებითაა გადატენილი.
აღსანიშნავია, რომ "სახალხო კრების" მოთხოვნა 20:00 საათიან "მოამბეში" ჩართვის შესახებ ჯერ ძალაშია, თუმცა მოთხოვნების შეუსრულებლობის შემთხვევაში "სახალხო კრების" ხელმძღვანელობა მომავალ გეგმებს გაახმოვანებს.
