შინაგან საქმეთა სამინისტრო ირაკლი ოქრუაშვილის მიერ გავრცელებულ მიმართვაზე პირველ კომენტარს აკეთებს. როგორც უწყების საინფორმაციო-ანალიტიკური დეპარტამენტის უფროსმა შოთა უტიაშვილმა "ჯი-ეიჩ-ენს" განუცხადა, თუკი ირაკლი ოქრუაშვილი საქართველოში შემოვა, მას მაშინვე დაიჭერენ.
"ჩამოვა თუ არა ოქრუაშვილი საქართველოში, ეს მისი გადასაწყვეტია. თუ საქართველოს საზღვარს გადმოკვეთს, მაშინვე დავიჭერთ, თუ არადა, იქნება თავისთვის საზღვარგარეთ. მის მიმართ სამართლებრივი დევნა არ შეწყვეტილა", - განმარტა უტიაშვილმა.
შეგახსენებთ, რომ საფრანგეთში მცხოვრებმა "ქართული პარტიის" ერთ-ერთმა ლიდერმა ირაკლი ოქრუაშვილმა დღეს ქართულ შეიარაღებულ ძალებს ღია მიმართვა გაუგზავნა, რომელშიც პირობას იძლევა, რომ ის სიცოცხლის რისკის ფასად ქართველი ხალხის გვერდით "ფიზიკურად" იდგება.
