თავდაცვისა და უშიშროების კომიტეტის თავმჯდომარე გივი თარგამაძე რუსეთის იმპერიის მიერ ჩრდილო კავკასიაში სხვა ერების მიმართ განხორციელებული გენოციდის აღიარების ინიციატივით გამოდის.
როგორც თარგამაძემ პლენარულ სხდომაზე განაცხადა, ჩერქეზთა გენოციდი ერთადერთი არ არის, რომელიც რუსეთის იმპერიამ ჩრდილო კავკასიაში განხორციელა.
"ამიტომ უნდა დავიწყოთ ჩრდილო კავკასიაში სხვა ერების მიმართ განხორციელებული გენოციდების აღიარების საკითხებზე მუშაობა. ამ საკითხს ისევე უნდა მიუდგეთ, როგორც ჩვენ გვინდა, რომ ცივილიზებულმა სამყარო განიხილოს ჩვენი საკითხი", - აღნიშნა თარგამაძემ.
მისი შეფასებით, მანკიერი ტრადიცია უნდა დაირღვიოს, როდესაც ყველამ ყველაფერი იციდა და არაფერს ამბობს.
"ჩვენ მივედით იქ, სადაც უნდა მოვსულიყავით ცოტა დაგვიანებით, მაგრამ ჯობს გვიან, ვიდრე არასდროს. ვერ წარმომიდგენია, ვინმეს ჰქონდეს კითხვა, იყო თუ არა ეს რუსეთის იმპერიის მხრიდან გენოციდი", - აღნიშნა საპარლამენტო უმრავლესობის ერთ-ერთმა ლიდერმა.
