"თურქეთი კავკასიის რეგიონში ერთ-ერთ ძირითად მოთამაშედ იქცევა, თუმცა იგი რუსეთთან ფრთხილად უნდა იყოს". ამის შესახებ განცხადება ცნობილმა ექსპერტებმა გააკეთეს, რომლებმაც ჯეიმსთაუნის ფონდში მონაწილეობა მიიღეს კონფერენციაში სახელწოდებით "ჩრდილოეთ კავკასიის ახალი გეოპოლიტიკა: ძველი და ახალი მოთამაშეები". ინფორმაციას ამის შესახებ აზერბაიჯანული მედია ავრცელებს.
ჯეიმსთაუნის ფონდის პრეზიდენტმა გლენ ჰოვარდმა აღნიშნა, რომ მსოფლიოსა და რეგიონში ჩრდილოკავკასიის მნიშვნელობა იზრდება და ვაშინგტონი უფრო მეტ ყურადღებას უნდა უთმობდეს ამ ზონას. მისივე თქმით, აქ არა მხოლოდ უსაფრთხოებასთან დაკავშირებული პრობლემები რჩება, არამედ ისინი იზრდება კიდეც.
ექსპერტებმა ასევე აღნიშნეს, რომ ამ რეგიონში დაძაბულობა იზრდება და თურქეთი ამ სივრცეში მნიშვნელოვან მოთამაშედ რჩება. ანკარის უნივერსიტეტის პროფესორი მიტხატ ჩელიკპალა აცხადებს, რომ თურქეთში არის დიდ ჩერქეზული დიასპორა და ჩრდილო კავკასიის ხალხები მას დიდ დახმარებას უწევენ.
ჩელიკპალამ ასევე განაცხადა, რომ სეპარატისტული აფხაზეთის "პრეზიდენტმა" სერგეი ბაღაფშმა თურქეთში ვიზიტი განახორციელა, თუმცა თურქეთის მთავრობა აცხადებდა, რომ ეს ვიზიტი კულტურის საკითხებთანაა დაკავშირებული.
ექსპერტის თქმით, თურქეთმა თავისი ყურადღების კონცენტრირება არა მხოლოდ კავკასიაში ლიდერობაზე მოახდინა, არამედ იმაზეც, რომ ევრაზიის ერთ-ერთი ლიდერი გახდეს.
ჩერიკპალამ გაიხსენა, რომ თურქეთმა გადადგა ნაბიჯები სავიზო რეჟიმის ლიკვიდაციისათვის რუსეთთან და გაააქტიურა ორმხრივი ვაჭრობა კავკასიაში.
მისივე თქმით, თურქეთი დაინტერესებულია კავკასიაში მშვიდობისა და სტაბილურობის დამყარებით და ქვეყნის პოზიცია რუსულ- ქართული ომის შემდეგ კიდევ უფრო გამყარდა.
