ცხინვალის ოკუპირებულ რეგიონში ე.წ. პასპორტიზაციის დაწყება შესაძლოა ქართველების მიმართ ახალი ეთნოწმენდის მიზეზი გახდეს. ამის შესახებ "ჯი-ეიჩ-ენს" ეროვნულ-დემოკრატიული პარტიის წევრმა, დეპუტატმა გურამ ჩახვაძემ განუცხადა.
მისი შეფასებით, ე.წ. ოსურ პასპორტებს საერთაშორისო სამართლის თვალსაზრისით არანაირი ძალა არ აქვს და სეპარატისტებს ეს შიდა მოხმარებისთვის სჭირდებათ, თუმცა პრობლემა შეექმნებათ ეთნიკურ ქართველებს, რომლებიც ჯერ კიდევ ცხოვრობენ ოკუპირებულ ტერიტორიებზე.
"ეთნიკურად ქართულ მოსახლობას, განსაკუთრებით კი ახალგორის რაიონში აიძულებენ აიღონ ეს პასპორტები და, შესაბამისად, უარი თქვან საქართველოს მოქალაქეებაზე. იმ შემთხვევაში თუ ქართველები ე.წ. ოსურ პასპორტებს აიღებენ, მათ "შეუნარჩუნდებათ" უფლებები კერძო საკუთრებაზე და სოციალური კუთხით. წინააღმდეგ შემთხვევაში "საერთაშორისო ნორმების დაცვით" ყველა უფლებას ჩამოართმევენ, რაც ახალ ეთნიკურ წმენდას გამოიწვევს", - აღნიშნა ჩახვაძემ.
დეპუტატის შეფასებით, აუცილებელია, ცხინვალის სეპარატისტული რეჟიმის ქმედებებს ქართულმა მხარემ სათანადო შეფასება მისცეს და საქმის კურსში ჩააყენოს საერთაშორისო თანამეგობრობა.
შეგახსენებთ, რომ ცხინვალის სეპარატისტული რეჟიმის ლიდერის ედუარდ კოკოითის ინფორმაციით, ე.წ. ოსური პასპორტების დარიგების ტექნიკური საკითხები უკვე დასრულებულია, შესაბამისად მის გაცემა იწყება.
აღსანიშნავია, რომ კოკოითი მოსახლეობას დაემუქრა, თუ ე.წ. ოსურ პასპორტებს არ აიღებენ, მაშინ რეგიონის დატოვება მოუწევთ, როგორც "უცხო ქვეყნის მოქალაქეებს".
