აშშ-ში საქართველოს ელჩი თემურ იაკობაშვილი საჩხერის რაიონში გუშინ მომხდარ ინციდენტს რუსეთის მიერ დესტაბილიზაციის ოკუპირებული ტერიტორიებიდან დანარჩენ საქართველოზე გადმოტანის მცდელობად აფასებს.
"ამერიკის შეერთებულ შტატებში მომხდარის გამო ყველა შეშფოთებულია, რადგან ეს არ არის ცალკეული ინციდენტი. ის წარმოადგენს ყველა იმ პირობის დარღვევას, რომელიც აქამდე არსებობდა. ეს არის რუსეთის მცდელობა, რომ დესტაბილიზაცია შეიტანოს ოკუპირებული რეგიონებიდან საქართველოს დანარჩენ ტერიტორიაზე", - აცხადებს თემურ იაკობაშვილი.
ამასთან, ქართველი დიპლომატის შეფასებით, მომხდარი კიდევ ერთხელ ადასტურებს, თუ რამდენად მნიშვნელოვანია ოკუპირებულ ტერიტორიებზე საერთაშორისო მისიების არსებობა.
შეგახსენებთ, რომ საჩხერის რაიონში რუსმა ოკუპანტებმა გუშინ ქართველების მიმართულებით ცეცხლი გახსნეს, რის შედეგადაც ორი მამაკაცი მძიმედ დაიჭრა.
