აფხაზური საზოგადოების ყურადღება აფხაზეთსა და რუსეთს შორის არსებული საზღვრის დელიმიტაცია-დემარკაციის საკითხზე ახალი პროექტის გაჩენამ გამოიწვია. რუსული მხარის მიერ მომზადებული დოკუმენტის მიხედვით, სოფელ აიბგას აფხაზური ნაწილი რუსეთს ეკუთვნის. ეს განცხადება აფხაზური ე.წ. პარლამენტის ვიცე-სპიკერმა ირინა აგრბამ გააკეთა.
მისი თქმით, აფხაზური მხარე არაფრის გადაკეთებას არ ცდილობს, მას მხოლოდ სურს საზღვარი დამტკიცდეს იქ, სადაც იგი, ყველა დოკუმენტის თანახმად, აფხაზეთსა და კრასნოდარის მხარეს შორის გადის.
"ისტორიულად აფხაზეთი საკმაოდ ხანგრძლივი დროის განმავლობაში მცირდებოდა და მცირდებოდა, ამიტომაც მიწის საკითხი აფხაზური საზოგადოების მიერ ძალიან მტკივნეულად აღიქმება. ეს გარკვეულწილად ჩვენი მეგობრული და ნდობითი ურთიერთობების შემოწმებაა და მათ უნდა გაუძლონ ამ გამოცდას მნიშვნელოვან საკითხში", _ განაცხადა აგრბამ.
აფხაზური ე.წ. პარლამენტის ვიცე-სპიკერი იმედს გამოთქვამს, რომ აფხაზური და რუსული მხარის წარმომადგენლები საერთო ენის გამონახვას შეძლებენ. "რუსეთი უზარმაზარი ქვეყანა და უზარმაზარი სახელმწიფოა და ეს არ არის ის საკითხი, რომელმაც შეიძლება სერიოზული უთანხმოებები გამოიწვიოს", _ განაცხადა აგრბამ.
სოფელი აიბგა მდინარე ფსოუს ზედა წელზე მდებარე მაღალმთიანი სოფელია.
