აშშ-ის პრეზიდენტმა დონალდ ტრამპმა განაცხადა, რომ ვაშინგტონი ირანის წინააღმდეგ სამხედრო დარტყმების განახლებას არ გამორიცხავს. მისი თქმით, ეს შესაძლოა, 25 ოქტომბერსვე მოხდეს, თუმცა თეირანთან შეთანხმების მიღწევის შესაძლებლობაც არსებობს.
ტრამპმა ამის შესახებ 24 ოქტომბერს, ფლორიდაში, ჟურნალისტებთან საუბრისას განაცხადა.
კითხვაზე, რამდენად ახლოსაა აშშ ირანზე შესაძლო ახალი თავდასხმის გადაწყვეტილებასთან, ტრამპმა უპასუხა, რომ ვაშინგტონი ამ შესაძლებლობას განიხილავს და სამხედრო მოქმედებები შესაძლოა, მომდევნო დღეს დაიწყოს.
„ამის გაკეთებას ვაპირებ? ვფიქრობთ, შესაძლოა, ხვალვე. არსებობს ამის ალბათობა. თუმცა არსებობს იმის შესაძლებლობაც, რომ დიდებულ შეთანხმებას მივაღწიოთ“, - განაცხადა ტრამპმა.
მისივე თქმით, ირანს შეთანხმების მიღწევა სურს, თუმცა ეჭვი გამოთქვა, შეასრულებს თუ არა თეირანი შეთანხმებით ნაკისრ ვალდებულებებს.
ტრამპის განცხადებით, მისი მიზანი ირანის მიერ ბირთვული იარაღის შექმნის სამუდამოდ აღკვეთაა. მან აღნიშნა, რომ ვაშინგტონი სამხედრო მოქმედებების განახლებასა და დიპლომატიური შეთანხმების მიღწევას შორის არჩევანის წინაშე დგას.
