ამერიკის შეერთებულმა შტატებმა და ვენესუელამ სამხედრო თანამშრომლობის აღდგენისა და გაღრმავების შესახებ შეთანხმება გააფორმეს. შეთანხმება ერთობლივ წვრთნებს, სადაზვერვო ინფორმაციის გაცვლას, სამხედრო აღჭურვილობისა და თავდაცვითი შესაძლებლობების განვითარებას ითვალისწინებს.
ამის შესახებ აშშ-ის თავდაცვის მდივანმა, პიტ ჰეგსეთმა კარაკასში, ვენესუელის დროებით პრეზიდენტ დელსი როდრიგესთან შეხვედრისას განაცხადა. ინფორმაციას Associated Press ავრცელებს.
ჰეგსეთის თქმით, ვაშინგტონი ვენესუელასთან თავდაცვის სფეროში თანამშრომლობის გაღრმავებას გეგმავს. მისი განცხადებით, ორ ქვეყანას შორის სამხედრო პარტნიორობა მოიცავს ერთობლივ წვრთნებს, სადაზვერვო ინფორმაციის გაზიარებასა და თავდაცვითი აღჭურვილობის მიწოდებას.
„ჩვენი სამხედროები ერთად გაივლიან წვრთნებს, ითანამშრომლებენ, გაცვლიან სადაზვერვო ინფორმაციას და გააძლიერებენ თავდაცვით შესაძლებლობებს“, - განაცხადა ჰეგსეთმა.
მან ასევე აღნიშნა, რომ ვენესუელა, რომელიც ადრე აშშ-ისთვის რეგიონში ერთ-ერთ მთავარ საფრთხედ მიიჩნეოდა, ახლა უსაფრთხოების სფეროში პარტნიორია.
თავის მხრივ, დელსი როდრიგესმა განაცხადა, რომ მიესალმება სამხედრო თანამშრომლობის განახლებას. მისი თქმით, ეს შესაძლებლობას შექმნის, გაძლიერდეს ვენესუელის შეიარაღებული ძალების მომზადება, გაუმჯობესდეს მათი აღჭურვილობა და გაიზარდოს თანამედროვე ტექნოლოგიებზე წვდომა, რათა ქვეყნებმა საერთო საფრთხეებს უპასუხონ.
შეთანხმების კონკრეტული დეტალები ჯერჯერობით არ გამოქვეყნებულა.
ჰეგსეთის ვიზიტი აშშ-ისა და ვენესუელის ურთიერთობებში მნიშვნელოვანი ცვლილებების ფონზე გაიმართა. მიმდინარე წლის იანვარში აშშ-ის სამხედრო ოპერაციის შედეგად ვენესუელის მაშინდელი პრეზიდენტი ნიკოლას მადურო დააკავეს, რის შემდეგაც ქვეყნის დროებითი ხელმძღვანელი დელსი როდრიგესი გახდა.
ჰეგსეთმა ასევე შეაქო ვაშინგტონსა და როდრიგესის ადმინისტრაციას შორის თანამშრომლობა და განაცხადა, რომ ის ვენესუელის სტაბილიზაციასა და ნარკოტრეფიკინგთან დაკავშირებული ქსელების წინააღმდეგ ბრძოლას ემსახურება.
აშშ-ის თავდაცვის მდივანმა დადებითად შეაფასა ვენესუელის ნავთობის სექტორში ამერიკული ინვესტიციების გაფართოების შეთანხმებაც. მისი თქმით, ეს შეთანხმება დასავლეთ ნახევარსფეროს ენერგომომარაგებას ჰორმუზის სრუტეზე დამოკიდებულებისგან გაათავისუფლებს.
როდრიგესის განცხადებით, ენერგეტიკის სფეროში თანამშრომლობა ორივე ქვეყნის მოსახლეობისთვის სასარგებლო იქნება.