ბერლინში, 19 ნოემბერს დაგეგმილ „მსურველთა კოალიციის“ შეხვედრაზე 30-ზე მეტი ქვეყნის ლიდერი უკრაინაში მრავალეროვნული სამხედრო ძალების განთავსების გეგმას განიხილავს. საუბარია მოკავშირეთა სამხედრო კონტინგენტის შესაძლო განლაგებაზე უკრაინაში საბრძოლო მოქმედებების დასრულების შემდეგ, უსაფრთხოების გარანტიების ფარგლებში.
ამის შესახებ უკრაინული მედია წერს.
ელისეის სასახლის განმარტებით, უკრაინისთვის უსაფრთხოების გარანტიები სამ ძირითად კომპონენტს მოიცავს: უკრაინის შეიარაღებული ძალების მხარდაჭერას, როგორც თავდაცვის პირველ ხაზს; „მსურველთა კოალიციის“ ფარგლებში უკრაინაში მრავალეროვნული ძალების (MNFU) განლაგებას და მყარი სამართლებრივი და პოლიტიკური უსაფრთხოების გარანტიების უზრუნველყოფას.
„ჩვენ ყოველთვის ვამბობდით, რომ ეს კოალიცია მშვიდობისთვის შექმნილი კოალიციაა. მშვიდობა კი მით უფრო მყარი და ხანგრძლივი იქნება, რაც უფრო ძლიერი და დაცული იქნება უკრაინა და ექნება გარანტია, რომ მას ხელახლა არ დაესხმებიან თავს“, - განაცხადა ელისეის სასახლის წარმომადგენელმა.
შეხვედრაზე ასევე განიხილავენ პოლონეთში მიმდინარე წვრთნებს, რომლებიც დასავლეთის ქვეყნების სამხედრო ძალების უკრაინაში შესაძლო განთავსების სცენარს ამუშავებს. წვრთნები 9 ნოემბერს დაიწყო და 22 ნოემბრამდე გაგრძელდება.
საფრანგეთის პრეზიდენტის ადმინისტრაციის ინფორმაციით, სწავლებაში დაახლოებით 2 800 სამხედრო მოსამსახურე მონაწილეობს, მათ შორის 1 100 ფრანგი სამხედრო. წვრთნებში უშუალოდ 11 ქვეყანაა ჩართული. გამოყენებულია დაახლოებით 30 თვითმფრინავი და 500 სატრანსპორტო საშუალება.
ელისეის სასახლის წარმომადგენლის განცხადებით, წვრთნების მიზანია იმის დემონსტრირება, რომ მრავალეროვნული ძალები უკრაინაში განლაგებისთვის უმოკლეს ვადაში მზად იქნებიან.